Халық арасында дүрбелең тудырған менингоккок жұқпасының таралу жағдайы өңірде қалыпты. Аймақта жыл басынан бері менингоккок инфекциясын 3 адам жұқтырған. Бұл туралы бүгін Ақтөбе өңірлік коммуникация қызметінде облыстық қоғамдық денсаулық сақтау департаментінің басшысы Нұрсұлу Беркімбаева мәлімдеді. Аты жаман аурумен ауырған 3 адаммен байланысқан 181 ақтөбелік тексерілген. Оң нәтиже анықталмады. Менингоккок жұқпасын жұқтырған отандастар саны қазір 58-ге жетті. 13 адам менингиттен көз жұмды. Алматы, Оңтүстік Қазақстан және Қызылорда облыстарының тұрғындары. Жас талғамайтын аурудан 6 бала қайтыс болды. Ал, аймақта былтыр дәл осы кезеңде менингитпен 7 ақтөбелік ауырған. Қуанышқа орай, өлім-жітім тіркелмеді. Осыдан 3 жыл бұрын ғана екі адам аурудың құрбаны болған. Инфекция жұқтырған 3 адамның екеуінің ауруын зертханалық сараптама арқылы анықтаған. Біреуінен клиникалық көрсеткіші арқылы дәрігерлер айқындаған. Дәрігерлер тұрғындарға менингоккок жұқпасын жұқтырудан қатаң сақтануды ескертеді. Әзірге тегін вакцина салуға мүмкіндік жоқ. Тек ақылы түрде ауруға қарсы екпе салдыра алады. Бүгін үкімет отырысында премьер-министр Бақытжан сағынтаев денсаулық сақтау министрі Елжан Біртановқа вакцина бағасын төмендетуді тапсырды. Еліміздің бас дәрігерінің сөзінше, менингитті емдеуге арналған дәрі-дәрмектер жеткілікті. Дүрлігудің қажеті жоқ. Ал індетке қарсы вакцинаның Ақтөбедегі бағасы қанша екені белгісіз. Облыстың бас санитар дәрігері тап басып айта алмады. Менингоккок инфекциясын жұқтырудың алдын алу шаралары қандай? Адамдар көп жиналатын жерлерге, ойын-сауық кешендеріне қажет болмаса бармау, денені тоңдырмай, жылы киіну қажет. Қолды және жеміс-жидекті мұқият жуу маңызды. Қайнатылған су ішіп, үйді таза ауамен желдетіп тұрыңыз. Жабық ғимараттарда медициналық бетпердені таққан дұрыс. Елде менингитпен күрес бойынша арнайы штаб құрылды. Ақтөбеліктерді мазалған сұрақтарға мамандар 90-70-70, 8702-502-00-93 телефон нөмерлері арқылы күндіз-түні жауап береді.