Малкеджар Бөкенбаев атындағы Ақтөбе заң институтына 20 жыл. Ел тәуелсіздігінің 25 жылдығымен тұспа-тұс келген мерейтойды оқу орнының ұжымы бүгін атап өтті. Салтанатты кеш оқу орнының ауласында митингтен басталды. Институтқа аты берілген Кеңес одағының батыры Малкеджар Бөкенбаевтың ескерткішіне қонақтар гүл қойды. Егемендіктің 25 жылдығымен қатар келген 20 жылдық мерейтойды бірге атап өту үшін оқу орнының ұжымы қаладағы өзге институт, университеттердің ректорларын, ішкі істер министрлігі, ішкі істер департаменті, облыстық, қалалық әкімдіктердің өкілдерін, ардагерлерін шақырған. Оқу орнының іргесі 1996-шы жылы қаланған. Алғашында Қостанайдағы жоғарғы оқу орнының филиалы ретінде қызметін бастады. Кейін колледж болып өзгерді. 2010-шы жылдан бері заң институты. Бүгін салтанатты кеш барысында заң институтының үздік оқытушылары марапатқа ие болды. Солардың бірі Алмат Салимов. 11 жылдық оқытушылық тәжірибесі бар психолог мерзімінен бұрын подполковник шенін алды. Бүгін 30-ға жуық қызметкер елбасының, ішкі істер министрінің атынан марапатқа ие болды. Сондай-ақ алғыс хат, құрмет грамоталары табысталды. Ақтөбе заң институтының бір ерекшелігі соңғы екі жылда жеделдетілген тәртіпте білім беру жүйесі енгізілді. Бакалавр академиялық деңгейлі білімі барлар заң институтында екі жыл оқып, диплом ала алады. Мектеп бітіріп түскен қыз-жігіттер 4 жыл оқиды.