Әлия Молдағұлова халықаралық әуежайының ұшып-қону айлағын жөндеу жұмыстары үшін мемлекеттік сатып алу байқауы жарияланды. Плиталарды ауыстыру жұмыстары үшін байқауға өтінімдер 29 наурыз бен 13-ші сәуір аралығында қабылданады. Тапсырысты "Әлия Молдағұлова халықаралық әуежайы" АҚ-ы берген. Әуе айлағына арналған плиталар "ПАГ-18" көлемінде. Плиталардың 300 данасы қажет. Бір плита 230 мың теңгеге бағаланған. Жалпы 69 млн теңге бөлініп отыр. Айта кетелік, қазір әуежай қызметі уақытша тоқтап тұр. Жөндеу жұмыстары 17-ші наурыздан бері жүріп жатыр. Әуежайдың анықтама бөлімінен ақпарат алғандардың арасында шетелдіктер де бар. Мәселен, Тәжікстан Республикасының азаматы Нуридин Бахтияров қалаға өткен аптада келген. Шаруаларын аяқтаған ол Казан қаласына бүгін ұшып кетуі тиіс болған. Анықтама бөлімінен рейстің біраз кешігетінін біліп отыр. Әлия Молдағұлова халықаралық әуежайының ұшып-қону айлағындағы жөндеу жұмыстары 17-ші наурыздан бері жүргізіліп жатыр. Осы аралықта әуе айлағында жаңартылуы тиіс плиталар саны артты. 300 дана плита ауыстырылуы тиіс. "Әлия Молдағұлова халықаралық әуежайы" АҚ басқарма төрағасы Дастан Малиевтің айтуынша, бүгіннен бастап бірнеше бағытта ұшақтар ұша бастайды. Ол қандай бағытта орындалатыны әзірге белгісіз. Әуе компаниялары рейстерді өздері жібереді. Атап өтейік, бұған дейін Әлия Молдағұлова халықаралық әуежайынан аптасына бес бағыт бойынша 52 ішкі рейс, басқа елдердің төрт қаласына аптасына 9 рейс орындалып келген болатын. Рейстерді тоқтатып қойған "Air Astana" , "SCAT", "Qazaq Air" компаниялары билеттерді басқа күнге брондауға болатындығын хабарлап жатыр.