Андрей Сидельников пен Самат Отарбаев қорғап жүрген қақпаға жауапсыз 5 гол соғамыз. "Ақтөбе" футбол клубымен матч өткізер алдында "Ақтөбе балалары" құрамасы осылай деп мәлімдеме жасады. Маңызды кездесу бүгін "Қобыланды батыр" атындағы орталық стадионда өтті.
Матч басталар алдында аниматорлар оларға балмұздақтар, сыйлықтар таратып, түрлі ойындар ойнатты. Ал балаларды қорғау күніне құрылған жаңа команда футболдан Қазақстанның 5 дүркін чемпионы "Ақтөбе" құрамасымен кездесуге тас түйін дайындықпен келген. Жолдастық матчқа 50 бала мен жасөспірім шақырылған. Олар облыстағы футбол орталықтарының тәрбиеленушілері, "Жайсаң" мектеп-интернатының тәрбиеленушілері және мүмкіндігі шектеулі балалар. Халықаралық дәрежедегі маңызды матчтар өтіп жүрген жасыл алаңға шыққандарына ұлдар дән риза. Ал сүйікті ойыншыларын жақыннан көргенде қуаныштарында шек болмады. Мұндай матчты елде алғаш рет "Ақтөбе" футбол командасы ұйымдастырды. Бүгінгі кездесу 3-2 есебімен аяқталды. "Ақтөбе балалары" құрамасы жеңіске жетті. Әлем бойынша балалар құрамаларына бұған дейін есе жіберген командалар Испанияның "Реал Мадриді", Англияның "Ливерпулі", украиналық "Шахтер" командасы.