«Ақтөбе» футбол клубы аукционға шығарылады

Облыстық мәслихатта өткен қоғамдық тыңдауда жекеменшікке берілген өңірдің басты футбол клубының болашағы талқыланды. Акционерлік қоғам нысаны сақталғанымен, қазіргі таңда «Ақтөбе» футбол клубында әлі сайланған басшылық та, акционерлер де жоқ, ал келесі жылға арналған мемлекеттік бюджеттен бөлінетін қаржы екі есеге жуық қысқарған. Күзде ақ-қызылдар клубының иесі Нұрлан Артықбаев болады деп облыстық әкімдікте хабарланған еді.
Облыстық спорт басқармасының басшысы келесі жылы «Ақтөбе» футбол клубына мемлекеттік бюджеттен 1 млрд 900 млн теңге бөлінетінін мәлімдеді. Бұл алдыңғы жылдармен салыстырғанда 1,5 млрд теңгеге аз. Қалған қаражатты клуб өз күшімен табуы тиіс. Ақ-қызылдар клубының жергілікті билік тарапынан бөлінген биылғы бюджеті 3,5 миллиард теңге. Клуб иесіне ең жоғары мақсаттар, яғни чемпиондық міндеті қойылып отыр. Легионерлерді алу бойынша қандай да бір шектеу болмайды, алайда Ақтөбедегі үш футбол мектебінің жергілікті тәрбиеленушілерін де командаға тарту қажет. Инвесторға бұдан өзге де қойылар талаптар бар. Басқарма басшысы келесі жылдан бастап балалар футболын дамытуға басымдық берілетінін атап өтті. Бұл бағыттағы жұмыстар жасөспірімдер спортын қолдауға және инфрақұрылымын дамытуға бағытталмақ. Сондай-ақ орталық стадион мемлекет меншігінде қала беретінін, ал клубқа жалдау негізінде берілетінін де атап өтті. Қоғамдық талқылауда депутаттар Мейрамбек Махамбетовке сауалдарын жолдады. Мейрамбек Махамбетовтың сөзінше, ұйымдастырушылық мәселелер мен «Ақтөбе» футбол клубын дамыту стратегиясын жеңімпазбен 2026 жылдың қаңтар айында талқыланатын болады. Тәуелсіз сарапшылар клубты 364, 3 млн теңгеге бағалаған. Клуб бүгін аукционға шығарылады. Сауда-саттық «Е-қазына» электрондық мемлекеттік алаңында өткізіледі. Бұл алаңда процеске араласудың ешқандай қаупі жоқ. Ал, биыл қарашада аймақ басшысы Асхат Шахаров Qazaq Stroy құрылыс компаниясының иесі Нұрлан Артықбаев "Ақтөбе" футбол клубына инвестор болатынын хабарлаған еді. Осылайша, "ақ-қызылдар" командасы биыл елімізде жекешелендірілген төртінші команда атанды. Бұған дейін «Қайсар», «Қызылжар» және «Жеңіс» клубтары жекешелендірілді.

Количество показов: 7
Дата создания: 23.12.2025 06:57:22