Тамыз айы басталғалы бірнеше қылмыстың беті ашылды. Атап айтар болсақ, аз уақыттың ішінде ұрлық, пара беру секілді деректер тіркелді. Сонымен қатар, облыс аумағында киік атып, олардың мүйізін сатумен айналысқан браконьерлер қолға түсті. 10-шы тамызда Қарабұтақ кентінде полицейлер киік атқан күдіктілермен сатып алушылар кейпінде кездесу ұйымдастырып, браконьерлерді қолға түсірді. Жыл басынан бері облыста заңсыз киік атудың екі жағдайы, дериваттарды заңсыз қолданудың 8 дерегі тіркелген. Ал 19-шы шілде мен 6-шы тамыз аралығында белгісіз ер адам қаладағы сауда үйінің біріндегі дүңгіршікті бірнеше рет тонаған. 56 жастағы әйелге тиесілі сауда нүктесінен пальто, көйлектерді ұрлаған баукеспе 400 мың теңгенің затын қолды қылған. Ұры дүңгіршікке сауда үйінің жоғарғы жағындағы саңылау арқылы түскен. Ұры ұсталып, тергеу амалдары жүруде. Қаладағы қылмыс қатары полицияға пара ұсынған дерекпен толықты. Алтыншы тамыз күні Заречный елді мекенінде карантин кезінде жұмыс істеген дүкен анықталды. Дүкен иесі әкімшілік жауапкершіліктен жалтару мақсатында учаскелік инспекторға пара ретінде 10 мың теңге көлемінде ақша ұсынады. Полиция қызметкері мұның заңсыз екенін түсіндірсе де, дүкен иесі сол күні учаскелік инспекторға "Kaspi.kz" қосымшасы арқылы 10 мың теңге көлемінде ақша аударған. Ал полиция қызметкері бұл хабарламаны өз басшылығына баяндаған. Аталған дерек бойынша "Пара беру" бабымен сотқа дейінгі тергеу басталды.Десек те, облыста жасөспірімдер арасындағы қылмыс азайған. Биыл жеті айдың қорытындысы бойынша аймақта жасөспірімдер арасындағы қылмыс 32,1 пайызға төмендеді. Қазір полицияда профилактикалық есепте 78, тізімдік есепте 303 жасөспірім тұр. Облыс бойынша 732 бала тәрбиеленетін 432 жағдайы төмен отбасы бар.Кәмелетке толмағандарды бейімдеу орталығына қорғансыз қалған 94 бала және панасыз қалған 24 бала жеткізілді. Ал сот шешімімен арнайы мектепке бір жасөспірім жіберілді.