Қалада өткен жылдардың салығын төлемей жүрген көлік иелері бар. Мемлекеттік кірістер басқармасының мәліметі бойынша, олардың саны - 903. Материалдар сотқа жолданып, сот орындаушылары шамамен 90 пайызының қарызын өндіріп берді. Бірнеше жылдық салық берешегі бар көлік жүргізушісі кеше сауда орталықтарының бірінде сот орындаушысының қармағына түсті. "Ауди" иесінің қарызы 200 мың теңгеден асады. Көлігі айыппұл тұрағына әкетілген жігіт екі сағаттың ішінде салықты төлеген. Қалада 71 мың көлік бар. Олардан бюджетке кем дегенде 1 миллиард теңге кіріс түсуі керек. Бірақ, көлік иелері міндетті төлемді жасауға асықпайды. Мемлекеттік кірістер басқармасының қара тізімінде қазір көлік салығы бойынша 9 жарым мың борышкер, 162 миллион теңге қарыз бар. Көлік салығын уақытылы төлемеген жүргізушілерге шара қолданылады. Борышкердің көлігі тәркіленіп немесе ел аумағынан шығуға тыйым салынады. Сондай-ақ, егер қарыз мөлшері 250 айлық есептік көрсеткіш көлемінен асса, белгілі бір мерзімге көлік жүргізу куәлігінен айырылады. Көлік салығын 31-желтоқсанға дейін төлеу керек.