Ақтөбеде 20 оқушы жаппай астан уланып дәрігердің көмегіне жүгінген. Олардың барлығы №9 мектеп гимназиясының оқушылары. Жедел ішек ауруы аталған мектептің мұғалімінен де анықталды. Науқастардың айтуынша барлығы мектеп асханасынан бөлке жеп, шырын ішкен. Қазір астан қатты ұшынған екі бала ауруханада жатыр. Бұл - №9 мектеп-гимназиясының асханасы. Бір мезетте 500-ге жуық оқушы сыятын үлкен асхана өткен сенбіден бері жабық. Санитарлық тексеру жүріп жатыр. Асханада 19-шы сәуір күні балалар соңғы рет тамақтанған. Ол күні қандай ас мәзірі ұсынылғанын аспазшының да, мектеп директорының да айтқысы жоқ. Тек мәлім болғаны астан уланған оқушылардың бөлке жеп, шырын ішкені. Мектеп асханасы "Наурызбаев" жеке кәсіпкерлігіне сәуір айының басында ғана жалға берілген. Тендер бойынша ұтып алған кәсіпкер бұл мектептен басқа тағы бірнеше білім ошағының асханасын жалға алған. Жаппай улану дерегі тіркелген соң қалалық қоғамдық денсаулық сақтау басқармасы мектеп асханасын тексеріп, бірнеше олқылықты анықтады. Тоңазытқыштағы мал еті мен тауық етінің сапасын көрсететін құжаттар, мұздатқышта термометр болмаған, жуылған ыдысты кептіретін орын да талапқа сай болмай шыққан. Мектеп асханасын жалға алған кәсіпкер санитарлық-эпидемиологиялық қорытындыны алмастан 3 сәуір күні жұмысын бастап кеткен. Ал қалалық білім бөлімі «үш күннен соң санитар-эпидемиологтардың қорытындысы қолымызға тиеді, мектеп әкімшілігінің тарапынан заңсыздықтарға жол берілгені расталса, тәртіптік жауапкершілікке тартылады" деп хабарлады. Мектеп асханасын жалға алып, заңсыз жұмысын бастаған кәсіпкерді қалалық қоғамдық денсаулық сақтау басқармасы әкімшілік жауапкершілікке тартпақ.