12-ші шағын аудандағы 50-ші үйдің 3-ші подъезінде техникалық бөлме тұрғынжайға айналып кеткен. Аядай жерді 81 жастағы кейуана 9 жылдан бері мекен етеді екен. 9 қатарлы үйде тұрып жатқандар екіге жарылды. Байырғы тұрғындар қарияны аяйды. Ал қалған жартысы әжейдің техникалық бөлмені босатқанын қалайды. Гүлзипа Ермағамбетова 81 жастағы зейнеткер. 12-ші мөлтек аудандағы 50-ші үйдің техникалық бөлмесінде тұрып жатқанына 9 жыл болған. Айтуынша, жалғыз қызынан басқа ешкімі жоқ. Ал қызы тұрмыста. 5 баласы мен ауру күйеуін әрең бағып отыр, дейді әжей. Әжейдің бұл жерді мекендегеніне тұрғындар наразы. Жарық өшсе не жедел саты істен шықса, әжейдің есігін қағуға мәжбүр боламыз. Бұл жер тұрғындарға қолжетімді болуы тиіс, дейді олар. Бойынан қуаты кетпей тұрғанда әжей осы үйдің аула сыпырушысы болып жұмыс жасаған. Ол уақытта бұл үй "Ынтымақ" пәтер иелері кооперативіне тиесілі болған. Тұрғындардың өтінішімен жалғызбасты кейуананы "Ынтымақ" ПИК өкілдері техникалық бөлмеге орналастырған. Соңғы 3 жылдан бері үй басқа кооперативке қарайды. Ал, әжей әлі сол бөлмеде тұрып жатыр. Жаңа тұрғындар қарттың бұл жерде тұрғанына ашулы. Бұл жағдайдан учаскелік полиция да хабардар. Талай рет бұл жерде тұруға болмайтындығын түсіндергенімен, әжейдің кеткісі жоқ. Қарттар үйіне де барғысы келмейді. Учаскелік полиция инспекторы оны өзінің үйіне де алып кетуге дайын. Қарияның жағдайымен қалалық мәслихат депутаты да таныс. Зейнеткермен ол да тілдесіп көрген.