8-ші мөлтек аудан тұрғындары 40 жылға жуық жөндеу көрмеген аулаларының жайын айтып бүгін мәселе көтерді. Өткен үш күндік нөсер жауында ықшам аудан тұрғындары шалшық пен балшықтан аяқ алып жүре алмай қалған. Халықтан жиналып жатқан салық қайда кетіп жатыр деп налиды орталық тұрғындары. Жанқожа Айтжанов бұл бес қабатты үйде 1983 жылдан бері тұрады. Жұбайы екеуі алғашқы болып қоныстанған тұрғындарының бірі. Айтуынша, үй берілген сәтте балалар үшін арнайы ойын алаңдары болыпты. Кейіннен қираған аттракциондардың қайда кеткенін ешкім де білмейді. Қазір аулада түк жоқ. Ойын алаңының орнына күз, көктем айларында су жиналады. Кеуіп, сасып жататын шалшықты балалар кешіп ойнайтын көрінеді. Ал, жанындағы тоғыз қабатты үй ауласы темір қақпамен қоршалғандықтан тұрғындардың жүріс-тұрысы мүлде қиындаған. Жаңбырда жиналған су үйдің жертөлесіне құйылған. Тұрғындар үйдің шаруашылығына жауапты пәтер иелері кооперативі төрағасына айтқанымен ол ешқандай әрекет қылмапты. Тұрғындардың мәселесі бойынша қала әкімдігіне хабарласқанымызда, ол жақтағы мамандар бұл мекенжай бойынша осы уақытқа дейін ешқандай арыз-шағым түспегенін айтты. Ағайынды Жұбановтар көшесіндегі №308 үй 1-ші ғимарат тұрғындары жазбаша түрде құзырлы органдарға шағымданып көрмеген. Сол себепті бұл мекенжай жоспармен биыл кезек бойынша балалар алаңы салынатын үйлер қатарына енгізілмеген. Бұл кезекке өту үшін тұрғындардың тарапынан жазбаша өтініш жолдануы тиіс.