6655 әскери бөлімінің қақпасы алдында 5-маусым күнгі атыс кезінде қаза болған майор Даниель Майлыбаев, кіші сержант Берік Қалиев пен қатардағы жауынгер Досбол Сапардың суреттері ілулі тұр. Қаралы митингке жиналған жұрт  гүл шоқтарын қойып, шырақ жақты. Ал әскери бөлім іші тып-тыныш. Әскери бөлімнің қару-жарақ қоймасы мен клубына апаратын жолда майор Даниель Майлыбаевтың оққа ұшқан жеріне гүл шоғы қойылған. Сәл жүрсек, тағы да гүл шоқтары жатыр. Бұл жерде қатардағы жауынгер Досбол Сапар қаза болды. Екеуі де қарусыз, алаңсыз, қорғаныссыз жүріп, қапыда кетті.Әскерилерге қарсы тұра алмайтынын  сезген сәтте олар қаша жөнелген. Қарулы қақтығыс кезінде бір қылмыскердің көзі құртылып, тағы екеуі ауыр жараланды. ҚР Ұлттық ұланы Бас қолбасшысының орынбасары Мұхамбетқали Сатовтың айтуынша, барлығы 17 қарулыға қарсы күзетте жүрген үш қызметкер тойтарыс берген. Өзгелері жалаң қол жүріп, жараланды. Қазіргі күні үшеуі ауруханада.Қазір осы оқиғаға байланысты тергеу жұмыстары жүріп жатыр. Ал 6655 әскери бөлімі қаза болғандар мен жараланған әскери қызметкерлер мен қатардағы жауынгерлерге әскери шен беру ұсынысын Мемлекет басшысына жолдайды.Қаралы митингке қатысқан облыс әкімі Бердібек Сапарбаев алғашқы боп тойтарыс берген, бар ауыртпалықты арқалаған әскери қызметкерлер мен жауынгерлерге алғысын айтты.Қазіргі күні әскери бөлім қызметкерлері қаза болғандардың жанұяларына, ауыр жараланған әріптестеріне арнап есепшот ашып, қаржы жинап жатыр.