Жаңа оқу жылы басталар-басталмас шаһар мектептері жақсы жаңалықтарымен бөлісіп жатыр. Бүгін №60-шы жалпы білім беретін мектепте "60 LIVE TV" телестудиясы ашылды. Жобаға қатысушылар - жоғары сынып оқушылары. Жасөспірімдер болашақта журналист болуды армандайды. Жобаның басты мақсаты - оқушылардың бос уақытын тиімді пайдаланып, әлеуметтік желілерде "Нұр Ақтөбе" ауданындағы жаңалықтармен бөлісу. Биыл №60- жалпы білім беретін орта мектептің ашылғанына төрт жыл. Осындай шағын уақыт ішінде білім ордасы үлкен бастамаларды қолға алуда. Солардың бірі бүгін көпке таныстырылған мектептің басыбайлы телестудиясы. Жоба шәкірттер мен ұстаздардың ортақ жетістігі. Студияның ашылуына мектеп директоры қолдау көрсетіп, мұғалімдер қолдан келген көмектерін аямаған. Заманауи технологиямен жабдықталған кабинетте жас журналист қалыптастыру үшін барлық жағдай жасалған. Тамыз айында оқушылар арасында кастинг ұйымдастырылып, оған 28 бала қатысқан. Байқаудан сүрінбей өткен 10 жасөспірім студияда жұмысын бастап кетті. Барлығы белсенді, оқу үлгерімдері жақсы, үлгілі оқушылар. Өздері тележүргізуші, өздері оператор. Қазір "Сыр сұхбат", "ABC", "Қорытынды жаңалықтар", "Халықпен бірге" бағдарламалары әзірленуде.
Телестудия әлеуметтік желілерде мектептің ғана емес "Нұр Ақтөбе" ауданының жаңалықтарымен бөліседі. Сондай-ақ журнал ашу да жоспарда бар. Жұмысқа құлшына кіріскен оқушылар мен олардың әр ісіне қолдау білдіріп отырған ұстаздар алдағы уақытта кәсіби мамандардан білім алмақ.