Өңірімізде 6 оқушы сыныптан сыныпқа көшпеуі мүмкін. Олар мектеп формасын сақтамаған, бірнеше тоқсан бойы сабаққа қатыспаған. Егер келесі оқу жылында да талапты орындамаса тағы мектепке кірмейді. Бұл туралы бүгін облыстық білім басқармасының басшысы Ләззат Оразбаева мәлімдеді. Олар қазір қосымша сабақтарға барып жүр. Үш ай демалыста мектеп бағдарламасын толық игерулері тиіс. Ата-аналары білім алуға жібермеген төртеуі облыс орталығындағы №31 орта мектептің оқушысы. Қалған екеуі Шалқардан. Барлығы 1-6 сынып оқушылары. Ата-аналарымен түсіндіру жұмыстары жүргізілуде. Облыстың бас ұстазы Ләззат Оразбаеваның сөзінше, қазір республика бойынша ата-ана мен мектеп арасында келісімшарт жасалған. Онда мектеп пен ата-ананың міндеттері нақты көрсетіледі. Орындалмаған жағдайда оқушылар заң бойынша мектепке кірмейді. Биыл мектепті 6669 түлек бітіріп шықты. 5300-ден көбі ұлттық біріңғай тестілеуден өтеді. Облыста Ұлттық біріңғай тестілеу 21-25 маусым аралығында өтеді. Жаңа форматта екінші жыл өткелі отырған ұлттық тестілеу өңірдегі 15 пункттің 125 аудиториясында өтеді. Ең төменгі бағалау шегі 50 балл. Ең жоғарғы көрсеткіш - 140 балл. Аймақта 523 түлек "Алтын белгіге" үміткер. 2016 жылмен салыстырғанда 79 үміткерге артық. Олар қазір мемлекеттік емтихандарын тапсырып жатыр. Ләззат Оразбаева былтырғы "Алтын белгі" үміткерлерінің барлығы үмітті ақтағанын айтады. Ал, мектеп бітіру кеші өңірде 15-маусымда өтеді.