Биыл Ақтөбеде 5705 бала жазғы лагерьлерде демалуы тиіс. 2000-ға жуық оқушы мектеп есебінен тегін демалса, әлеуметтік осал топтағы 1183 бала қалалық бюджет есебінен тегін тынығады. Бүгін Ақтөбеде "Жазғы демалыстың ұйымдастырылуы" атты жиын өтті. Оған мектеп директорлары, санитар мамандар, құтқарушылар мен тәртіп сақшылары қатысты. Оқушылардың бос уақытын қызықты өткізу, олардың денсаулығын қалпына келтіру, түрлі танымдық шараларға қатыстыру- педагогтардың міндеті. Осы мақсатта биыл бірнеше мектепте тақырыптық лагерьлер ұйымдастырылмақ. "Өлкетану-туристік", "Спорттық", "Экологиялық" және "Тілдік лагерьлерге" 1200 бала баруы тиіс. Ең алдымен жетім балалар, көп балалы немесе толық емес отбасылар, сонымен қатар жалақысы төмен отбасылардың жеткіншектері тегін лагерьмен қамтылу құқығына ие. Ол үшін бала өзі білім алып жатқан мектеп әкімшілігіне әлеуметтік жағдайын растайтын анықтама тапсыруы тиіс. Жазғы каникул кезінде ата-аналар балаларды қараусыз қалдырмауы тиіс. Оқушылардың қауіпсіздік мәселесі де жиынға арқау болды. Санитар мамандар жедел ішек инфекциясының өршитін кезі жаз екенін ескертіп, балалардың тамақтануына аса көңіл бөлуді айтса, тәртіп сақшылары балалардың әр қадамын аңдып отыруға кеңес берді. Балалардың қатысуымен болатын жол-көлік оқиғаларының басым бөлігі жаз мезгілде болатынын тілге тиек етті.