Осыдан төрт жыл бұрын, дәл осы күні қалада аласапыран болды. Ел аузында "Ақтөбедегі қаралы жексенбі" деп аталып кеткен, билік лаңкестік деп баға берген оқиға 2016-шы жылдың 5-ші маусымында жасалған еді. Қару-жарақ дүкендеріне, 6655 әскери бөліміне жасалған шабуылдардан 8 адам құрбан болды. Оның бесеуі қарапайым қала тұрғыны. 2016-жылдың 5-ші маусымы. Бұл жексенбі болатын. Түскі сағат 14-30-да Ә. Молдағұлова даңғылындағы "Паллада" қару-жарақ дүкеніне 25 адам баса көктеп кіріп келеді. Лаңкестердің ең кішісі 18 жастағы Сұлтан Қабиевтің қолында ғана жалғыз травматикалық тапанша болған. Қолындағы қаруымен ол дүкенші Андрей Максименконы көк желкесінен атады. Жараланған дүкеншіні бірсыпырасы тепкінің астына алады. Қалғаны дүкенді тонайды. Шығуға беттеген олар аңшы мылтығымен Максименконы төсінен атып, өлтіреді. Осындай аласапыранда дүкеннің кассирі дабыл тетігін басып, күзетке белгі жіберген. Дереу жеткен арнайы күзет қызметкерінің бірі сыртта қалып, екіншісі Мирхан Тәжібаев ішке беттегенде оны қылмыскердің бірі басынан атып өлтіреді. "Паллада" дүкенінен лаңкестер 18 атыс қаруы, екі травматикалық, екі пневматикалық тапанша, 1 пневматикалық винтовка, 32 пышақ, мың жарымдай оқ дәріні көшеге алып шыққан. Оқиға куәгерлері сол күнді әлі ұмыта алмай жүр. "Палладаның" түбінде атысып, полиция қызметкерлерін жаралап, полиция көлігін иемденген лаңкестер екіге бөлініп кетеді. Полиция көлігімен алты қылмыскер қаланың көне бөлігінде Жанқожа батыр көшесіндегі "Пантера" қару-жарақ дүкеніне бет алады. "Паллада", "Пантера" қару-жарақ дүкендерінің орнында қазір қоғамдық тамақтану нысандары жұмыс жасап тұр. Біздегі лаңкестіктен кейін елде көп қатарлы тұрғын үйлердің бірінші қабатында, тіпті қала ішінде қару-жарақ дүкендерін ашуға заңмен тыйым салынды. Лаңкестер баса көктеп кірген №6655 әскери бөлімінде де бүгін тыныштық. Дмитрий Таңатаров бастаған 17 адам көше бойынан жолаушылар автобусын кепілге алып, әскери нысанға шабуылдаған болатын. Бүгінде әскери бөлім тас дуалдармен қоршалған. Бейнекамера орнатылған. Темір қақпаның ішкі және сыртқы жағында тісті кедергілер бар. Қару-жарақ қоймасы үшін әскерилер мен лаңкестер арасындағы қақтығыстан мұнда 3 әскери қызметкер қаза тапты. Бүтін елді шулатқан оқиғадан хабары жоқ адамдар да бар екен немесе естеріне мүлдем алғысы келмейді. Төрт жыл бұрынғы оқиғада 8 адам құрбан болды. Оның бесеуі азаматтық тұлға. Арнайы операциялар нәтижесінде тоғыз қылмыскер ұсталып, 18-і өлтірілді. Арнайы операцияны ұлттық қауіпсіздік комитеті мен полиция бірлесе жүргізді. Маусымдағы қырғынға күдікті деп 29 адам ұсталды. Сотта қақтығысқа тікелей қатысқан 9 қылмыскердің жетеуі өмір бойына бас бостандығынан айрылды. Біреуі түрмеде қайтыс болды. Қалғандары қазір жазаларын қатаң тәртіптегі колонияда өтеп жатыр. Тағы екеуіне 20-22 жыл жаза кесілді. Өзгелері де жасаған қылмыстарының деңгейіне сай жазаларын алды.