Ақтөбеде соңғы лаңкестік оқиғаның болғанына бүгін 3 жыл толды. 2016 жылы 5 маусым күні белгісіз 13 адам алдымен қару-жарақ дүкендеріне шабуыл жасап, кейін №6655 әскери бөліміне басып кірді. Қарулы қақтығыс кезінде әскери бөлімнің 3 қызметкері көз жұмды. Бүгін ерлікпен қаза тапқан жауынгерлерді еске алып, қақтығысқа қатысқан батырлар естеліктерімен бөлісті. Бүгін Ораза айт мерекесінің алғашқы күні. Ал, үш жыл бұрын Рамазан айы басталған күні белгісіз адамдар алдымен шаһардағы қару-жарақ дүкендеріне шабуыл жасап, кейін №6655 әскери бөлімін басып кірді. Қанды қырғын террорлық акт деп танылып, қауіпсіздіктің қызыл деңгейі өңірде бір апта бойы сақталды. 7 адам қаза тапты. Қарапайым тұрғындар да бар арасында. 9 маусымда Ұлттық аза тұту күні жарияланды. Елде ту төмен түсіріліп, лаңкестік оқиға кезінде қаза болғандарды еске алу шаралары өтті. Ақтөбеде антитеррорлық штаб құрылып, барлық күштік құрылым күшейтілген тәртіпте жұмысқа көшті. Ақтөбедегі қауіпсіздіктің қызыл деңгейі 12-маусым күні сарыға ауыстырылды. Сол кезде ҚР Ұлттық қауіпсіздік комитеті төрағасының орынбасары генерал-майор Нұрғали Білісбеков лаңкестер қару иеленгеннен кейін түзеу мекемелеріне және жекелеген мемлекеттік органдарға шабуылдауды жоспарлаған деп мәлімдеді. Лаңкестер ұсталып, кейін сотталды. Қаза болғандары да бар. Ұлттық гвардияның №6655 әскери бөліміне шабуыл кезінде лаңкестерге әскери қызметкерлер тойтарыс берді. Соңғы оғы қалғанша атысып, ерлікпен қаза тапқандар қатарында келісім шарт бойынша жұмыс істеп жүрген әскери қызметкер Берік Қалиев, мойор Даниэль Майлыбаев, қатардағы жауынгер Досбол Сапаров бар. Бүгін ерлікпен қаза тапқан жауынгерлерді еске алып, қақтығысқа қатысқан батырлар естеліктерімен бөлісті. №6655 әскери бөлімінің қызметкерлері бұл күнді - Батырлар күні деп жариялаған. Әскерилер әріптестерінің рухына тағзым етті. Бүгінгі шараға теракт кезінде ерлік көрсеткен 5 әскери қызметкер шақырылған. Арасында қақтығыс кезінде жараланған жауынгерлерге медициналық көмек көрсеткен медбике де бар.