Құрылысшы саяжайындағы бүтін бір үй күлге айналды. 5 баласы бар отбасы кеше далада түнеген. Күлі ғана қалған үй "Құрылысшы" саяжайында орналасқан. 5 балалы отбасы кеше түнде аулаларында түнепті. Бүгін аптап ыстықтан қорғану үшін шатыр жасап қойған. Батыр Тоқмамбетов пен жұбайы жұмысқа кеткен кезде кенеттен баспаналарының шатыры жана бастапты. Төтенше оқиғаның басты куәгері үйдің тұңғышы 12 жасар Бақыт Құраутай. Ол бауырларының екеуін сыртқа шығарып, көршілерінен көмек сұраған. Ал, 2 жастағы ұлды көрші құрылысшылар алып шығыпты. Құжаттар, балалардың жаңа оқу жылына дайындаған құралдары түгел жанып кетті. Батыр Тоқмамбетов - "Құрылысшы - 7" саяжайындағы №15 участокті бар жиған-тергенін салып, 4 жыл бұрын сатып алған. Әйтеке би ауданының тумасы жұбайы екеуі 2013 жылға дейін пәтер жалдап жүріпті. Қазір отанасы 6-шы баласына жүкті. Бірі жол сыпырушы, енді бірі мектепте еден жуады. Ал, өрт сөндірушілер жеткен кезде үйдің дымы қалмаған. Өрт оқиғасы отбасыға "жығылғанға жұдырық" болды. Бұл баспана көктемде тасқын судың ортасында қалған. Ол кезде қалалық әкімдік Тоқмамбетовтерге 150 мың теңге көлемінде өтемақы беріпті. Үй иелері 2009 жылдан бері жер кезегінде тұр екен. Ал, қалалық әкімдіктегілер Тоқмамбетовтерге көмектің берілетінін не берілмейтінін нақтыламады. Барлығы өрт сөндірушілердің сараптама қорытындысына байланысты шешіледі. Ал, сараптама нәтижесі сенбі күні шығады.