Биыл Ақтөбеде 4 мектептің құрылысы басталмақ. Олар-Батыс-2 ауданындағы 600 және 320 орындық мектептер, Сазды-Бауырластар ауылы мен К.Нокин ауылындағы жалпы орта білім беру мекемелері. Бүгін қалалық мәслихаттың кезектен тыс 9-сессиясында Ақтөбенің 2016-2018 жылдарға арналған бюджетіне толықтырулар мен өзгерістер енгізіліп, білім нысандарының құрылысына қаражат қарастырылды. Мәселен, құрылысы биыл басталатын 4 мектептің құрылысына қосымша 48 млн.800 мың теңге бөлінеді. Жобалық-сметалық құжаттары дайын. Мемлекеттік сараптамадан өтті. Жыл басынан бері оқулық сатып алуға 370млн. 658 мың теңге жұмсалса, Кірпішті ауылында салынған мектепті жарақтандыруға 40 млн. 603 мың теңге бөлінген. Бүгінгі сессия барысында білім саласына тағы да қосымша қаражат бөлінді. Жиын барасында қала әкімі жылыту маусымына даярлық жұмыстарын ерекше бақылауға алуды тапсырды. Қала әкімінің орынбасары Нағымжан Алдияровтың айтуынша, бұл жұмыстар қазан айына дейін толық аяқталуы тиіс.