Бүгін Нұр Ақтөбе ауданында 30 адамға пәтер кілті табысталды. Баспаналы болғандардың барлығы да "Тұрғын үй құрылыс жинақ банкінің" салымшылары. 2 және үш бөлмелі пәтерлер "Нұрлы жер" мемлекеттік бағдарламасы аясында салынған. "Тұрғын үй құрылыс жинақ банкі" арқылы пәтер кілтін иеленіп жатқандардың саны күн санап артып келеді. Солардың бірі Ермановтар отбасы. Зейнеткер Салтанат Ерманова осыдан үш жыл бұрын тәуекелге бел буып, банкке ақша жинай бастайды. Енді міне бүгін зейнетақысынан тірнектеп жиған қаржыға ұлына 2 бөлмелі пәтер алып беріп жатыр. Құны 7 млн.154 мың теңгені құрайтын пәтерде 6 адам тұрады. Ал алты жыл бойы ай сайынғы төлемі 30 мың теңге. Көптен күткен үйіне қол жеткізіп, төбесі көкке жетіп жатқан жалғыз Салтанат Ерманова емес. Оның 5 жастағы немересі де қуанышты. Сәби үш қабатты үйдің ойын алаңына ғашық. Қоныс тойын тойлайтын азаматтардың қатарында үш баланың анасы Гүлнұр Сағынова да бар. Бірнеше жыл бойы пәтер жалдап тұрған ананың қуанышында шек жоқ. Жыл басынан бері "Тұрғын үй құрылыс жинақ банкі" арқылы 600 адам баспаналы болған. 9 қабатты үйлердегі пәтерлердің құны бір шаршы метрі үшін 110 мен 120 мың теңге. Ал үш қабатты үйлердің бағасы әр шаршы метрі үшін 120 мың теңгеден. Жылдың соңына дейін 1655 салымшыға баспана кілттері табысталуы тиіс.