Қалада 9-11 қараша аралығында облыстық "Қысқы карта" шұғыл алдын алу шарасы өтті. Тәртіп сақшылары тұрақты мекен-жайы  жоқ жандарды көшеден ұстап, арнайы орындарға орналастырмақшы. Қақаған қысты далада емес, жылы жерде өткізсін деген ниетпен жыл сайын өткізілетін шара кезінде  100-ден астам кезбе  ұсталған. Қазір олардың құжаттары мен туыстарының бар-жоқтығы анықталып жатыр. Кейін қалалық ІІБ-ның қабылдап-тарату бөлімі мен қалалық белгілі тұрағы жоқ және қылмыстық жазасын өтеген тұлғаларды әлеуметтік бейімдеу орталығына жіберіледі. 

Жыл басынан бері Елек полиция бөліміне 200-ге жуық тұрақты мекені жоқ адам түскен. Арасында нәзік жандылар да бар. 120-дан астамы қалалық ІІБ-ның қабылдап-тарату бөліміне жеткізілген. Полиция қызметкерлерінің қолына түскен көше кезбелері саябақтар мен супермаркеттер жанында көп жүреді. Сондай-ақ, Орталық базар мен Құрмыш аудандарында да жиі кездеседі. Тіркеуге алынғандардың 80 пайызы ішімдікке салынғандар мен Қазақстан азаматы ретінде тіркеуде тұрғандар. Тек қолдарында құжаттары жоқ. Дегенмен, "баспанасыз көше кезіп жүрген жандардың басым бөлігі ауылдан қалаға жұмыс іздеп келгендер" дейді тәртіп сақшылары. Жұмыс таба алмаған соң ауылдарына қайтуға ұялады. Соңында ішімдікке салынады. Ал, балалары мен туыстары алып кетсе, үйлерінен қашып шығып, көшедегі достарына қайта қосылатындар көп.