Ақтөбеде үш айдың ішінде 16 мемлекеттік қызметкер сотталды. Жыл басынан бері ақтөбелік шенеуніктердің үстінен 50-ден астам қылмыстық іс қозғалып, тергеліп, сотқа жолданған. Соның 76 пайызы - сыбайлас жемқорлық деректері. Мәселен, Темір аудандық ішкі істер бөлімі басшысының орынбасары Абдуллин ақпан айында қызметтік лауазымын пайдаланып, ішкі істер саласына қызметке еш кедергісіз кіруі үшін Тәженов есімді азаматты алдап, 350 мың теңге алған. Кінәлі деп танылып, 3 жарым жылға шартты жаза кесілді. Ал, Мұғалжар аудандық ішкі істер бөлімінің аға инспекторы Саршин үш тұрғынның атынан жолда жүру ережелерінен сынақ тапсырып, сұрақтарға жауап берген. Бір қызығы - ол тұрғындар жүргізушілік куәлік алуға өтініш білдірмеген болып шықты. Қызметін асыра пайдаланған инспектор "капитан" атағынан айырылып, бас бостандығы екі жылға шектелді. Сотталған 16 мемлекеттік қызметкердің бесеуі - денсаулық сақтау саласында қызмет еткен. Бірі - СПИД-ке қарсы күрес орталығының бұрынғы басшысы Гүлнәр Садықова. Ауыл шаруашылығы басқармасының бас маманы Өтегенов үш адамды трактор жүргізу сынағынан өткізіп берген. Сол үшін 25 мың теңге пара алған. Аға сот орындаушы да тұрғынды әкімшілік жазаға тартпау үшін ақша алған. Бұдан бөлек, білім бөлімінің бір маманы, әкімшіліктің екі қызметкері осыған ұқсас қылмысы үшін заң алдында жауап берді. Сондай-ақ, құрылысқа жалған лицензия беретін екі тұлғаның әрекеті әшкере болды. Сөйтіп, сотталған шенеуніктердің кесірінен мемлекетке 158 миллион теңге залал келді. Мемлекеттік қызметкерлердің кейбірінің тәртібі де нашар. Әдеп кеңесінде "бұзақылыққа" жол берген төрт қызметкердің тәртібі қаралған. Мамандардың әрбір қадамы бақылауда болған соң ба, мемлекеттік қызметке қызығушылық аз. Жыл басынан бері 503 лауазымға конкурс жарияланған. Соның жартысына ғана маман келді.