25 жастағы қала тұрғыны жеке клиниканың берген анықтамасымен келіспей отыр. Төрт айға жуық уақыт үйінде төсек тартып жатқан ол ешкіммен тығыз қарым-қатынаста болмағанын айтады. 26-шы наурыз күні "Олимп" клиникасының мобильді бригадасы ПТР-сынаманы оның үйіне келіп алып кеткен. Ертесіне тест коронавирустың оң нәтижесін көрсеткенін хабарлаған. Қуаныш Кершетай бүгін облыстық жедел жәрдем ауруханасының неврология бөліміне жатуы керек болатын. Тегін ем алуыма қате берілген анықтама кедергі келтіруде, дейді ол. 25 жастағы Қуаныш Кершетай Оңтүстік-батыс ауданындағы жер үйде жалғыз өзі тұрады. Сол аяғынан зақым алған жас жігіт екі апта бұрын Нұр-Сұлтан қаласындағы оңалту орталықтарының бірінде кешенді ем қабылдап келген. Жүйелі емделіп жүрген Қуаныш Кершетай бүгін облыстық жедел жәрдем ауруханасының неврология бөлімінде емін жалғастыруы керек еді. Бірақ бүкіл жоспары ағзасынан коронавирус анықталғаны үшін іске аспай отыр. 26-шы наурызда үйіне келіп ПТР-сынама алған дәрігерлер оның ағзасынан вирустың симптомсыз түрін анықтаған. Дегенмен жеке клиниканың берген анықтамасымен Қуаныш Кершетай келіспейді. Ол өзінен коронавирус белгілерін байқамайтынын айтады. Тіпті наурыз айы бойы тұмауратып та көрмегенін, жөтелмегенін де ашып айтты. Жеке клиниканың жасаған сараптамасына күмәнданған ол туысқандарының көмегімен Пацаев көшесінде орналасқан үлкен жеке ауруханада өз қаражатына ПТР-тестін тапсырады. Ол тест жігіттің бойында коронавирус жоғын көрсеткен. Мүмкін сараптама жасау барысында қателік кетті ме деп мән-жайды анықтау үшін ол кейін "Олимпке" бірнеше рет хабарласып та көрген. Онымен ешкім жауап қатпаған. Бұл мәселе Қуаныш Кершетайдың уақытымен ауруханаға жатып, портал арқылы тегін емін жалғастыруына үлкен кедергі келтірді. Ол облыстық денсаулық сақтау басқармасына мәселені анықтау үшін кеше өтініш тастаған. Құзырлы орган қызметкерлері әзірге өтінішіне жауап қайтармаған.