Бүгін Халықтық кеңседе мемлекеттік қызметтер жәрмеңкесі өтті. Мемлекеттік қызметтер жәрмеңкесіне қалалық әкімдікке қарасты бірнеше бөлімнің, Тұрғын үй құрылыс жинақ банкі мен облыстық "Атамекен" кәсіпкерлер палатасының өкілдері қатысты. Облыстық мемлекеттік қызмет істері және сыбайлас жемқорлыққа қарсы іс-қимыл департаментіні мамандарының сөзінше, жәрмеңкеде ақтөбеліктер үй, жер мәселелері бойынша кеңес алған. Мұндай жәрмеңке тоқсан сайын ұйымдастырылады. Тұрғындар үшін өзекті мәселелердің бірі - мемлекет төлейтін атаулы әлеуметтік көмек алу. Кеңес алғандардың кейбіреуі көмекке қол жеткізе алмайтындарын біліп қайтты. Ал, бүгінге дейін шаһарда 6 900 отбасының 36 400 мүшесіне атаулы әлеуметтік көмек тағайындалған. Атаулы әлеуметтік көмекке тиесілі 21 мың теңгені алу үшін отбасылар ажырасып, ер адамдар жұмыс істеуден бас тартып жатыр. Қазір қалалық жұмыспен қамту орталығына еңбек орындарын ұсынушылар саны артқан. Бірақ, жұмыс істеуге құлықсыздар саны артып келеді. Ал, жалғызбасты аналар алимент талап етіп, алуға жүгінбейді. Тіпті, өздері бас тартады дейді мамандар. Бүгін барлығына кеңес берілді. Жәрмеңкеде одан өзге бірінші сыныпқа балаларды орналастыру, "Бақытты отбасы" мемлекеттік бағдарламасымен пәтер алу туралы да ақпарат берілді.