Бүгінгі күні қала бойынша жер кезегінде тұрған азаматтар саны 145 916 адамды құрайды. Ал 2014 жылдан бері жеке тұрғын үй салу үшін 29 218 жер учаскесі бөлінген. Бұл туралы бүгін қалалық әкімдікте өткен брифингте қалалық жер қатынастары бөлімінің басшысы Ислам Ізбасқанов айтты.Ағымдағы жылы «Жаңа ауыл-3», «Сазды-3», «Рауан-2», «Баянауыл» тұрғын үй алаптарынан жалпы 6500 жер телімі берілген. Қазір 2007 жылы жер кезегіне тұрған ақтөбеліктерге жер телімдері беріліп жатыр. Олардың саны 4552 . Оларға жеке тұрғын үй құрылысы үшін жер учаскелерін беруді 2022 жылы аяқтау жоспарлануда. 2020 жылдың басында біздің қала жер учаскелерін беру жөніндегі пилоттық жобаға енгізілген болатын. Жоба негізінде жер учаскелерін интернетте электрондық аукцион арқылы сатуды бастаған алғашқы қалалардың бірі- Ақтөбе. Осы жылдың басынан бәссаудада жалпы аумағы 15,9 гектарды құрайтын 25 жер учаскесі сатылды. Одан мемлекетке 39 миллион теңге көлемінде қаржы түсті. Ал былтыр жалпы сомасы 61 миллион теңгеге 29 жер учаскесі сатылды. Біздің қала бойынша 428 бау-бақша ұжымы бар. Оның 221-і ғана бау-бақша шаруашылығымен айналысады. Алдағы уақытта қала аумағында ауыл шаруашылығына арналған жерлердің пайдаланылмауы немесе мақсатсыз пайдаланылуы бойынша жалпы ауданы 12 321 гектарды құрайтын 22 субьектіге қатысты тексеру жұмыстары жүргізілетін болады.