15- қыркүйектен бастап ақтөбеліктер тұмауға қарсы екпе қабылдай алады. Вакцинация тегін және ақылы түрде жүргізіледі. Ол үшін тұрғылықты мекен жай бойынша тіркелген емханаларға бару керек немесе жеке клиникаға бару жеткілікті. Ресейлік "Гриппол+" вакцинасымен емханалар толық қамтылған. Бұл туралы бүгін өңірлік коммуникация қызметінде өткен баспасөз мәслихатында белгілі болды. Облыстық тауарлар мен көрсетілетін қызметтердің сапасы мен қауіпсіздігін бақылау департаменті басшысының орынбасары Мұхтар Сербаев тұмауға қарсы екпе салу науқаны биыл жаһандық пандемияға байланысты бір айға ерте басталатынын хабарлады. Өңірімізде былтыр қазан айынан бері 7567 адам өткір респираторлы вирустық инфекция жұқтырған. Бұл-ресми мәлімет. Өз бетімен емделіп жүргендері қаншама. Әсіресе, күз-қыс айларында салқын өткізіп, ауырғандардың қатары көп.Тұмауға шалдықпас үшін, ең әуелі жеке бас гигиенасын сақтаған жөн. Ауру асқынған жағдайда адам денсаулығы күрт нашарлап, тіпті өлімге алып келуі мүмкін. Қазір тұмау мен респираторлы вирусты инфекцияны жұқтырғандарды емдейтін препараттардың түр-түрі бар. Емханаға бас сұқсаңыз арзанын да, қымбатын да таңдап алуыңызға болады. Алайда, бұл науқасты құлан таза сауықтырады деп ешкім кепілдік бере алмайды, - дейді мамандар. Мұндай дертке шалдыққандарды оқшаулап ұстау керек. Әсіресе, қазіргі жағдайда балаларды қоғамдық жерлерге апармай, далада жиі серуендеткен дұрыс деп кеңес берді. Бүгінге дейін облысқа вакцинаның 98 мың дозасы жеткізілген. Дәрігерлер былтырғы нәтижесі жақсы болған ресейлік "Гриппол плюс" екпесін қайтадан салады. Емханаларда халықтың жекелеген түрлеріне ақысыз түрде салынады.Биыл екпелерді сатып алуға 58 млн теңге бөлінді. Бұл қаржы жергілікті халықтың 20 пайызына екпе салуға жетеді. Қыркүйектің 15-де басталатын науқан бір жарым айға жалғасады. Вакцинация ерікті түрде жүргізіледі. Ешкімге күштеп екпе салынбайды. Індетке байланысты аудан мен қала емханаларында 68 жылжымалы медициналық бригада жұмыс жасайды. ҚР Денсаулық сақтау министрі Алексей Цой биыл тұмауға қарсы екпелер жаппай салынуы қажеттігін баса айтты. Себебі, халықаралық тұмаудың екі жаңа түрі тарай бастады. Олар "А" типтегі "Ганконг" пен "В" типтегі "Вашингтон" вирустары. Соңғы екі жылда елімізде тұмаудың асқыну белгілері тіркелмегенмен. Бірақ, ауадағы вирустар әсер етпей қоймауы мүмкін. Ел бойынша бірыңғай дистрибьютордың тұмауға қарсы 2 млн 199 мың 990 вакцинасы сатылып алынған. Екпе жұмыстары алдымен жүрек қан тамырлары мен тыныс алу жолдарында созылмалы аурулары бар адамдарға, жиі ауыратын балаларға, медициналық қызметкерлерге тегін жүргізілмек.