Батыс-2 ауданында көп қабатты тұрғын үй салуға арналған жер телімі аукционда 46 миллион теңгеге сатылды. Бұл бүгін қалалық әкімдікте өткен ашық аукциондағы ең жоғарғы баға. Бәссауданың қорытындысы бойынша қала қазынасына 121 миллион 260 мың теңге түсті. Бәссаудаға дүкен, дәмхана, наубайхана, көп пәтерлі тұрғын үй және автогаз құю стансалары секілді кәсіпкерлік мақсаттағы құрылыстар үшін 10 жер учаскесі шығарылған. Аукционға 117 адам қатысты. Көбі - Кірпішті және Заречный елді мекендерінде газ құю бекетін салатын жер телімдеріне таласты. 

Сауда ағылшын әдісімен жүргізілді. Мысалы, бастапқы бағасы 104 мың 247 теңге болған Кірпіштідегі газ құю бекеті салынатын жер учаскесі аукционда 30 миллион теңгеге сатылды. Ал, Батыс-2 ауданында көп қабатты тұрғын үй салынатын 1,7 гектар жер  бәссаудада 1 миллион 715 мың теңгеден бірнеше есе өсіп, соңында 46,5 миллион теңгеге сатылды. Кобозев көшесінде сауда павильонын салуға арналған жер телімінің бастапқы құны 8 мың теңге болса, аукцион нәтижесінде учаске 2 миллион 850 мың теңгеге сатылды. Жер телімдері 3 жыл мерзімге жалға беріледі. Бүгінге дейін қалада үш рет аукцион өтті. Жалпы көлемі 16,1 гектарды құрайтын 27 учаске 82 миллион теңгеге сатылды.