12 - шағын аудандағы №26 - үй тұрғындары жаурап отыр. 9 қабатты үйдің төбесінен аққан су жертөлеге дейін жеткен. Шатырдағы қар, жаңбыр суын жинақтап, ағызып жіберетін құбыр тесілген. Жаңа құбырды тұрғындар сатып алып қойған. Ауыстыруы ғана қалып тұр. Ал пәтер иелері кооперативі жұмысшыларында құбыр кесетін құрылғы жоқ.Көп қатарлы үйде бұл проблема былтыр басталған. Шатырдағы қар, жаңбыр суын төменге бағыттайтын арық қызметін атқарушы құбырдың әбден тозығы жеткен. Енді жаңбыр жауса, су сорғалап жертөлеге дейін жетіп барады, дейді бұдан әбден мезі болған тұрғындар. Бастапқыда "Ынтымақ" пәтер иелері кооперативі жұмысшылары шатыр тесік деп пайымдаған. Ең жоғарғы 9- қабат тұрғындары өз қалталарынан қаражат шығарып, сол бойда шатырды ауыстыртқан. Онымен су тоқтамайды. Кейін тұрғындар қайта бірігіп, ағын суларды бағыттайтын құбыр сатып алады. Бір подъезде 36 пәтер бар. Тұрғындар "Ынтымақ" пәтер иелері кооперативіне ай сайын қызмет ақысын өтеп тұр. Ал пәтер иелері кооперативі лайықты қызмет көрсетпейді, дейді тұрғындар. Осылайша бүтін бір үйдің мәселесі бір сынық "болгаркаға" қарап тұрған болып шықты. Темір кескіш құрал жөнделген бойда, жұмысшылар іске кіріседі.