Ақтөбеде аулаларды абаттандыру қарқынды жүріп жатыр. 2020 жылы 40 тұрғын үйдің ауласына асфальт төселді. 2021 жылы бірден 100 аула жөнделген. Биыл 45 аула жаңғыртылмақ. 101-атқыштар бригадасы көшесіндегі №14- ші үйдің ауласы да биылғы жоспарға енген. Бірақ әлі күнге дейін жұмыс атқарылмаған. Тұрғындар ауланың осы күзге дейін жөнделетіндігіне үміттеніп жүр. 101-атқыштар бригадасы көшесіндегі №14 үйдің тұрғындары күн суытпай аулаларын абаттандырып беруді сұрайды. Мұндағы ата-аналар біраз жылдан бері балаларымыз тозығы жеткен алаңда ойнауға мәжбүр десе, ер адамдар автотұрақ сұрайды. Ал зейнеткерлер үшін жаңбырлы күндері подъезге кіру мұң. Телегей-теңізге айналады дейді осы жерді. 10 қабатты тұрғын үй 1989 жылы салынған. 33 жылдан бері ауласы еш жөндеу көрмепті. Мұнда 160 отбасы тұрып жатыр. Аяқ астында тегіс асфальт, үлкен кісілер таза ауада демалып отыратын орын мен балаларға ойын алаңы қажет. Былтыр ғана осы маңға қала әкімі Асхат Шахаров келіп, 2022- ші жылы жөндеуден өтетін аулалардың тізімінде №14 үй де бар екенін айтқан болатын. Шынында да, көршілес аулалар абаттандырылған. Ал №14 үй назардан тыс қалған. Қала әкімдігі өкілдерінің айтуынша, бұл үйдің ауласын жөндеу биылғы жоспарда жоқ. Келер жылы ғана кірісеміз деп отыр.
Сондықтан жақын арада аталмыш үй маңы ретке келеді деп үміттенбеген абзал. Бар үміт келер жылда.