Облыста балаларына миллиондап алимент төлей алмай жүрген 100-ге жуық әке бар. Олардың дені жұмыс істемейді. Мүлкі жоқ, бірнеше рет ескерту берілгенімен, сот шешімін орындамайды. Амангелді Әлімбетов 3 баланың әкесі. Ол екі рет үйленіп, дәм-тұзы жараспаған соң ажырасып кеткен. Қазір  өндіріп алушының бірі Ақтауда, екіншісі Астана қаласында тұрады. Екі әйелдің біреуі әкімшілік жауаптан соң қылмыстық іс қозғау туралы арыз жазып қойған. Бүгін сот орындаушылары анасымен бірге тұратын борышкер әке Амангелді Әлімбетовтің мүлкін тәркілеуге келді. Үш бөлмелі пәтерде тұратын борышкердің өз атына жазылған мүлкі жоқ. Бәрі анасына тиесілі. Бережағы 1 миллион теңгеден асып кеткенін анықтаған сот орындаушылары ескі теледидарды тәркілеуге шешім шығарды. Бұған дейін борышкер әке 5 тәулікке де қамалған. Сот орындаушылары қарызын еске салу үшін айына бір рет хабар беріп отырады. Жыл басынан бері мемлекеттік сот орындаушыларына алимент өндіру бойынша 10 мың іс түскен. Оның 4 мыңы аяқталды. Кейбірі өндіріп алу ісін жеке сот орындаушысына берген. Сот орындаушыларының мемлекеттік қызметін біртіндеп қысқарту туралы тапсырмаға орай жақын уақытта бұл қызметтің бәрі ақылы болуы мүмкін. Сол кезде борышкер қарызымен қатар сот орыншадаушысының қызметіне ақы төлейтін болады. Қазірдің  өзінде әкімшілік жауапқа тартылғандар екі шығынды арқалап жүр.