Бүгін бүкіләлемдік ЖИТС-ке қарсы күрес кампаниясы басталды. Бұл туралы облыстық ЖИТС-ке қарсы күрес орталығының мамандары мәлімдеді. Кампания шеңберінде емханаларда бір ай бойы ашық есік күндері өтіп, жедел тексерулер жүргізіледі. Соңғы мәлімет бойынша облыста 266 адам ВИЧ инфекциясымен есепте тұр. Оның 225-і халықаралық стандарт бойынша ем алып жатыр. 14 адам жазбаша түрде емделуден бас тартқан. Қалғандары дәрілерді жүрдім-бардым қабылдайды және бір бөлігі ем қабылдауға енді дайындалып жатыр. Қазір облыста ауру жұқтырғандардың емделу көрсеткіші 85 пайыз. Келесі жылы 90 пайызға жеткізу жоспарланып отыр. ВИЧ жұқтырғандардың арасында 20-29 жастың ортасындағылар көп. Олардың үлесі 41 пайыз. Науқастардың 63 пайызы жыныстық жолмен жұқтырған. Есірткі арқылы жұқтыру азайған. Мамандардың айтуынша алдын алу шаралары көбіне оқу орындарында жиі өткізіледі. Жыл бойы дәрігерлер жастарға індет туралы мағлұмат беріп, парақшалар таратады. Бүкіләлемдік күрес кампаниясы кезінде қаладағы барлық емханаларда және аудандардағы денсаулық орталықтарында ашық есік күндері өтеді. Тұрғындар жедел тест арқылы тексеріледі. Қазір Ақтөбе республика бойынша ауру көрсеткіші жөнінен 14-орында. Биылғы 10 айда ВИЧ жұқпасымен 37 адам тіркелген. Оның 30-ы індетті жыныстық жолмен жұқтырып алған. Дәрігерлердің айтуынша ВИЧ бірден белгі бермейді. Мәселен есірткі қабылдайтын бір ақтөбелік өзінің жазылмайтын ауруға шалдыққанын тоғыз жылдан соң бір-ақ білген. ВИЧ инфекциясының 4 сатысы бар. Соңғы сатыларында ғана науқас ауруханаға түсіп, түгел тексеруден кейін ғана індет анықталуы мүмкін. Сол себепті қандай да бір қауіпті қарым-қатынас болса бірден тексерілу керек. Тексеру тегін. Айына облыста тіркелген сырқаттарды емдеуге бес миллион теңге бөлінеді. Бұл ақшаға ВИЧ жұқтырғандарға ішетін дәрілер беріледі. Қазақстан бұл айықпас дертке шалдыққандарды тегін емдейтін мемлекет. Ал емделуден бас тартқандармен қазір психотерапевттер айналысып жатыр. Егер дер кезінде тексеріліп, бірден ем қабылдайтын болса ауруды басқаларға жұқтыру қаупі жойылады. Мұндай талаптарды орындаған бірнеше ақтөбелік әйел өмірге дені сау бала әкеліп, бақытты өмір сүріп жатыр. ЖИТС-ке қарсы бір айлық кампания 5-желтоқсанда аяқталады.