Ақтөбеде балабақшалар жұмысы тоқтап, 1 -сыныпқа қабылдау кейінге қалдырылды. Себебі емханалардың карантинге жабылуына байланысты балалардың денсаулық паспорты мен алған вакцинациялары туралы анықтамасын алу мүмкін болмай отыр. Құжат тапсырып үлгермеген ата-аналардың алаңдауына еш негіз жоқ. Эпидемиологиялық ахуал тұрақталғаннан кейін балалар мектепке дейінгі ұйымға, мектепке қабылданады. Өңірдің бас мемлекеттік санитарлық дәрігерінің қаулысымен облыста 25- маусымнан бастап балабақшалар жұмысы тоқтайды. Ал, 1- сыныпқа құжаттар қабылдау 1-ші тамызда басталады. Себебі, қазіргі ахуалға байланысты қаланың емханалары жабық тұр. Сәйкесінше балалардың денсаулығы туралы 026 және 063 секілді анықтамаларын алу мүмкін болмай отыр. Айта кетейік, Ақтөбеде балабақша қызметкерлері арасында коронавирус жұқтырудың 9 жағдайы тіркелген. Мұндай мәліметті облыстың бас мемлекеттік санитарлық дәрігері Нұрсұлу Беркімбаева келтірді. Ал, балабақшалардың жабылуына қатысты шешімге ақтөбеліктер екі түрлі пікір білдірді. Бірі бұл балалардың қауіпсіздігі үшін дұрыс десе, енді бірі керісінше балалар үшін балабақшаларда қалған тиімдірек деп ойлайды. Себебі үйдегі ересектер арасында вирус жұқтыру қаупі әлдеқайда жоғары,- дейді. Өз кезегінде облыстық білім басқармасының мамандары ата-аналарға алаңдауға еш негіз жоқ дейді. Қалай болғанда да, бұл шаралар балалардың қауіпсіздігі үшін жасалып отыр. Жағдай тұрақталысымен балабақшалар жұмысы қайта жанданады, ал жаңа оқу жылына дейін барлық балалар мектепке қабылданып үлгереді.