Қалада "Қауіпсіз апта" жедел алдын алу шарасы өтіп жатыр. Жергілікті полиция басқармасының инспекторлары апта бойы жолдағы қозғалысты жіті бақылап, жүргізушілердің құжаттарын тексереді. Кеше басталған науқанның алғашқы күнінде жолда жүру ережесін бұзған 500-ге тарта адамның үстінен хаттама толтырылды. Кешегі бір күнде бұрын көлік жүргізу құқығынан айырылғанымен рөлге отырған, оның үстіне ішімдік ішкен ер адам ұсталды. Оның үстінен Қылмыстық кодекстің 346-бабымен қылмыстық іс қозғалды. Жол қозғалысын ұйымдастыруды бақылау бөлімінің басшысы Айдос Құлжановтың айтуынша, жедел-профилактикалық шаралар ақтөбелік жүргізушілерді тәртіпке салады. Осындай акцияларды жиі өткізудің арқасында біздің облыста жол-көлік апаттарының саны азайған. Мысалы, биылғы жеті айда Ақтөбеде 325 жол-көлік апаты тіркелген. Былтыр сондай кезеңде өңірде 365 апат болды.