Қазан айының бірінен бастап ақтөбеліктер тұмауға қарсы екпе қабылдай алады. Вакцинация тегін және ақылы түрде жүргізіледі. Бүгінге дейін қалаға 34 мың дозалық екпе жетіп тұр. Дәрігерлер былтырғы нәтижесі жақсы болған ресейлік "Гриппол плюс" пен голландиялық "Инфлювак" екпесін қайтадан салады. Соңғысы емханаларда ақылы. Биыл екпелердің бағасы 1600 -2800 теңге аралығында. Тұмаудың нағыз өршитін кезеңдері күз айларының ортасы. Сондықтан мамандар бұл мезгілдерде сұйық тамақтарды жиі қабылдау дұрыс дейді. Жиі ауырып қала беретін тұрғындар немесе қандай да бір ауруына байланысты есепте тұрғандар тұрғылықты мекен-жайы бойынша қалаған екпесін ала алады. Биыл екпелерді сатып алуға 29 млн теңге бөлінді. Бұл қаржы жергілікті халықтың 10 пайызына екпе салуға жетеді. Дәрігерлер соңғы кезде екпе алуға қарсы ақтөбеліктердің саны біраз азайып келе жатқанын алға тартады. Ол үшін де біраз түсіндіру жұмыстары жүргізілген. Қазанның бірінде басталатын науқан бір жарым айға жалғасады. Вакцинация ерікті түрде, ешкімге күштеп екпе салынбайды. ҚР бас санитар дәрігері Жандарбек Бекшин биыл тұмауға қарсы екпелер жаппай салынуы қажеттігін баса айтты. Себебі, халықаралық тұмаудың екі жаңа түрі тарай бастайды. Олар А типтегі "Сингапур" мен В типтегі "Колорадо" вирустары. Соңғы екі жылда елімізде тұмаудың асқыну белгілері тіркелмегенмен. Бірақ, ауада жүрген вирустар әсер етпей қоймауы мүмкін. Қазақстан аумағында қазір 57 болжау орталығы жұмыс жасайды.