Елде коронавирусқа қатысты эпидемиологиялық жағдайдың нашарлауына байланысты "қызыл" аймақтағы өңірлерде карантин талаптары қатаңдатылмақ. Біздің өңір "қызыл" аймақта. Облыстың бас санитар-дәрігері Нұрсұлу Беркімбаева алдағы күндері Ақтөбеге қатысты жаңа қаулы жария етілетінін мәлімдеді. Қазір барлық мекеме өз қызметтерін қайта реттеу үшін жаңа қаулыны күтіп отыр. "Қызыл" аймақта тұрған өңірлерде демалыс және мереке күндері Ashyq жобасына қатысушыларды қоспағанда, спорттық-сауықтыру нысандары, сауналар, СПА-орталықтар, бассейндер, кинотеатрлар, театрлар, концерт залдары, компьютерлік клубтар, боулинг, бильярд, караоке, көрмелер қызметіне тиым салынады. Сондай-ақ, Ashyq жобасына қатысушыларды, ашық базарларды, жәрмеңкелерді қоспағанда, ауданы 2000 шаршы метрге дейінгі азық-түлік емес тауарларды өткізу жөніндегі объектілер, білім беру орталықтары, балалар мен ересектерге арналған үйірмелер, балалар даму орталықтары демалыста жұмыс жасамайды. Сенбі, жексенбіде қоғамдық көліктер де қатынамайды делінген ведомствоаралық комиссия таратқан ақпаратта. Алайда біздің қаладағы жолаушы тасымалына жауапты "Автопарк" және "Қалалық жолаушылар автокөлік кәсіпорны " мекемелері басшылықтары облыстық санитарлық-эпидемиологиялық бақылау департаментінен хабар күтіп отыр. Облыстың бас мемлекеттік санитар дәрігері қалай қаулы етсе, жұмыс та солай жүргізіледі. Жұмыс күндері "Ашық" жобасын қолданбайтын фитнес- орталықтар, фитнес-клубтар, йога- орталықтар, сауналар, спорт обьектілері, бассейндер кешкі 8-ге дейін жұмыс жасайды. Сауда үйлері мен сауда желілері сағат кешкі 6-ға дейін, ал қоғамдық тамақтану нысандары кешкі сағат 6-ға дейін жұмыстарын атқаратын болады. Бұл шектеулер де облыс көлемінде жаңа қаулы шығарылған күннен бастап қолданылады.