Бүгін қала әкімдігінде құқық бұзушылықтың алдын алу жөніндегі ведмоствоаралық комиссия отырысы өтті. Қалада жыл сайын саны артқан көлік қозғалысы қауіпсіздігін қамтамасыз ету мақсатында бағдаршамдарды көптеп орнату мәселесі сөз болды. Сондай-ақ, көшелерді жарықтандыру жұмыстары жалғаспақ. Жол қауіпсіздігін қамтамасыз ету бойынша атқарылар жұмыс биыл да аз емес. Қалада көлік саны артқан. Сондықтан көлік құралын тізгіндеген азаматтарға артылар жауапкершілік жүгі ауыр. Ал жолдарда бағдаршамдар орнату мен көшелерді жарықтандыру кезек күттірмейтін мәселе. Осы мәселеге қатысты жауапты мамандар 40 миллион теңгеге сұраныс берілгенін айтты. Бұдан бөлек, қала әкімі Асхат Шахаров полицияға халық көп шоғарланатын орталық базар маңындағы жол қозғалысын реттеуді тапсырды. Ал мүліктік құқықбұзушылыққа жол бермеу шаралары аясында ескі 75 тұрғын үйге темір есіктер орнату жоспарланып отыр. 36 нысанның ауласы қоршалып, 100 дана бейнебақылау камералары орнатылады.