Бүгін ақтөбелік шенеуніктер облыста дизель отынына қатысты қалыптасқан жағдайға ресми түсініктеме берді. Облыстық кәсіпкерлер басқармасының сауда бөлімінің басшысы Думан Дәулетияров тапшылықты ішінара отынға сұраныстың артуымен байланыстырады. Сондай-ақ, елдегі мұнай өңдеу зауыттарында жөндеу жұмыстары басталып, уақытша жабылған. Бұл да дизель отыны балансына әсер еткен. Бүгінде өңірде 2000 тонна солярка қоры бар. Алайда биліктегілер бұл қордың қанша уақытқа жететінін ашып айта алмай отыр. Өңірдегі сұйық отын тапшылығын қалпына келтіру үшін Ресейден 5,4 мың тонна солярка жеткізілмек. Көрші елдегі баға айтарлықтай қымбат. Сондықтан бізде дизель майының бағасы қазіргісінен де қымбаттауы мүмкін. Қаламызда қазір дизель отының орташа бағасы литріне 260-280 теңге аралығында. Дизель отынына қатысты мәселе екі апта бұрын басталған болатын. Биыл Атырау мұнай өңдеу зауытында электр желісі істен шығып, жоспар 200 мың тонна соляркаға кем орындалған. Айта кету керек, Павлодар мұнай-химия зауыты бүгінге дейін жұмыс жасап келеді. Өндіріс орнында жөндеу жұмыстары енді басталмақ.