Өңірдің спорт саласындағы мәселелері бүгін тағы да тізбектелді. Жыл сайын көтерілетін проблемалар әлі шешімін таппаған. Бұл туралы бүгін облыстық дене шынықтыру және спорт басқармасының басшысы Мейрамбек Махамбетовтің есеп беруінде облыс әкімі Бердібек Сапарбаев айтты. Жиынға аймақтағы спорт бөлімдері, спорт мектеп, колледж басшылары, жаттықтырушылар жиналды. Аймақтың бас спортшысының сөзінше, бұқаралық спортпен айналысатын ақтөбеліктер саны былтыр 31,4 пайызға жеткен. Ел бойынша Ақтөбе 3-орында. Дегенмен, облыс әкімі биыл бұқаралық спортқа тартылғандар көрсеткішін 3-5 пайызға арттыруды тапсырды. Ақтөбелік спортшылар арасынан олимпиада ойындарының әлі күнге бір де бір чемпионы шықпады. Спорт басқармасы мен спорт федерациялары арасындағы жұмыс әлсіз. Былтыр еркін күрес, дзюдо, грек-рим күресі мен жүзуден ғана жақсы көрсеткіш болды. Мейрамбек Махамбетовтің сөзінше, бапкерлерді өзге өңірлерден шақыртып, жалақыларын аттыру мәселесі қарастырылып жатыр. Бірнеше жыл бойы нәтиже көрсете алмаған басшылар жұмысынан босатылатынын ескертті. Аймақ басшысының пікірінше, жасөспірімдер қылмысының артуы да спорт саласының төмендігінен. ЖОО мен арнаулы орта білім беру мекемелерінде спорттық базалар мен құралдар мүлдем пайдаланылмайды. Шаһардың өзінде де миллиардтаған қаржыға салынған ғимараттар іске асырылмай қаңырап тұр. Мектептердегі спорт залдарында ойнайтын қарапайым доп та жоқ. Спорт мектептеріндегі жағдай тіптен мүшкіл. Балаларды қаладан, облыстан тыс жерлердегі жарыстарға апаратын ақша жоқ. Спорттық киім, құрал-жабдықтарынан бастап жол пұлын ата-ананың өзі көтеруге мәжбүр.