Өңірде зиянкестерге қарсы өңдеу жұмыстары жүргізілуде
Елімізде бүгінгі күні шегіртке зиянкестеріне қарсы химиялық өңдеу жұмыстары 1,3 млн гектар алқапта жүргізілді, бұл 2026 жылға жоспарланған жұмыс көлемінің 62%-ын құрайды, деп хабарлады ауыл шаруашылығы министрлігінің баспасөз қызметі. Ақпарат бойынша, қазіргі уақытта ауыл шаруашылығы аумақтарын зерттеу бүкіл еліміз бойынша жүргізілуде. Мониторинг және қорғау іс-шараларына 3,5 мыңға жуық маман жұмылдырылды. Барлық өңірлер пестицидтердің жеткілікті қорымен және қажетті техникалық құралдармен қамтамасыз етілген. Шегірткеге қарсы өңдеу жұмыстары өңірімізде де жүріп жатыр. Ағымдағы жылы облыс бойынша 424 мың гектарға италияндық прус шегірткесін улауға жоспарланды,- дейді аумақтық инспекция басшысы. Бүгінгі таңда жоспарланған көлемнің 297 мың гектарына химиялық өңдеу жүргізілді. Яғни 70 пайыз жоспарланған жұмысқа сай жүргізіліп жатыр. Қазір өңір бойынша шегірткеге қарсы жүргізіліп жатқан жұмыстар нәтижесінде, ешқандай кауіп төніп тұрған жоқ деді жауапты. Мониторинг және өңдеу жұмыстарын жүргізу үшін елде әуе кемелері, 103 пилотсыз ұшу аппараты және мамандандырылған жерүсті техникалары пайдаланылады. Қорғау іс-шараларына барлығы 556 бірлік техника жұмылдырылған, бұл зиянкестердің таралу ошақтары анықталған кезде жедел ден қоюға және қажетті қорғаныс шараларын уақтылы жүргізуге мүмкіндік береді. Ақтөбе өңірі бойынша да зиянкестермен күресуге бірқатар техника мен әуе ұшақтары жұмылдырылды. «Қазіргі уақытта елдегі фитосанитарлық жағдай тұрақты. Шегіртке зиянкестерінің жаппай таралу қаупі барынша азайтылды, мониторинг және қорғау іс-шаралары штаттық режимде жалғасуда», - деді ведомство. Министрлік мәлімдегендей, жүргізілген іс-шаралар нәтижесінде ауыл шаруашылығы алқаптарына зақым келтіруге жол берілмеген.Количество показов: 8
Дата создания: 25.06.2026 07:02:35
