Өңірде тұрғын үй нарығында баға тұрақты ма?

Өңірде тұрғын үй нарығында баға тұрақталып, кей сегменттерде төмендеу байқалады. Мамандардың айтуынша, биыл көктем айларында баспана құны шамамен 13 пайызға арзандаған. Қазір жаңа тұрғын үйлердің бір шаршы метрінің бағасы орналасқан жеріне, қабатына және құрылыс компаниясына байланысты орта есеппен 340 мың теңгеден басталып, 500 мың теңгеге дейін жетеді. Екінші нарықтағы пәтерлердің бағасы 320 мыңнан 480 мың теңгеге дейін бағаланады. Сарапшылардың сөзінше, сатып алушылар көбіне ипотека рәсімдейді. Дегенмен кей азаматтардың несие тарихы баспана алуға кедергі келтіреді.
Тұрғын үй нарығында түрлі жеңілдетілген бағдарламалар ұсынылғанымен, баспана алу көпшілік үшін әлі де оңай емес. Соған қарамастан тұрғындар арасында ипотека арқылы үй алушылар көп. Алайда жоғары баға мен несие талаптары баспаналы болуды қиындатып отырғанын айтады тұрғындар. Қазіргі кезде құрылыс компанияларымен серіктестік аясында Астана мен Алматы қалаларынан тұрғын үйді 30 немесе 50 пайыз бастапқы жарнамен рәсімдеу мүмкіндіктері ұсынылуда. Ал жылжымайтын мүлік мамандары нарықта бір және екі бөлмелі пәтерлерге сұраныс жоғары екенін жеткізеді. Бірақ тұрғындардың басым бөлігі үшін баспана бағасы әлі де өзекті мәселе болып қалып отыр. 

Количество показов: 10
Дата создания: 19.06.2026 08:20:00