Өңірде бұқаралық спортпен айналысатындар көбейген

2025 жыл өңір үшін спорт және туризм саласында табысты кезең болды. Облыстық дене шынықтыру, спорт және туризм басқармасы өңірде дене шынықтыру және спортпен шұғылданатын тұрғындар саны 420 мың адамға жетіп, үлесі 44 пайызды құрағанын айтты. Бұл - 2024 жылмен салыстырғанда 12 мың адамға артық. Мүгедектігі бар азаматтарды спортқа тарту көрсеткіші де өсіп, 1 899 адамды құрады. Халықтың спорт инфрақұрылымымен қамтылуы 65,8 пайызға жетті. Ұлттық спорт түрлеріне қызығушылық артып, онымен айналысатындар саны 38 мыңнан асты. Облыста 1747 спорт нысаны жұмыс істейді, оның 19-ы соңғы екі жылда жаңадан салынған. Сонымен қатар, туризм де дамып жатыр дейді Мейрамбек Махамбетов. Былтыр Ақтөбеге келген туристер саны 233 мың адамға жетіп, 22 пайызға артты. Туризмге тартылған инвестиция көлемі 60 млрд теңгеден асады. Өңірде барлығы 46 туристік нысан бар, оның ішінде 22 табиғи аймақ пен 8 ерекше қорғалатын аумақ. Хромтау, Байғанин, Мәртөк және Алға аудандарында жаңа төрт спорт мектебі ашылды. Кәсіби бағытта 9 клуб жұмыс істейді: футбол, волейбол, баскетбол, хоккей, ММА, гандбол, ұлттық спорт, үстел теннисі және олимпиадалық спорт клубтары. Облыста спорт инфрақұрылымы кеңейіп, туризм саласында да жаңа жобалар іске қосылып, өңірдің белсенділігі артып келеді. 
Количество показов: 6
Дата создания: 03.02.2026 05:45:06