Өңірде Қазақстанның урбанистер форумы өтті. Ақтөбе облысы әкімдігінің қолдауымен ұйымдастырылған шараға әртүрлі салалардан өкілдер қатысты. Форумның ашылуына қатысқан облыс әкімі Ералы Тоғжанов сәулетшілердің жұмысын бағалайтынын жеткізді. Жоспар бойынша алдағы жылдары Елек өзенінің жағалауы толықтай демалыс орнына айналуы тиіс. Форумда шаһардың экологиясын, әлеуметтік секторын және көлік қауіпсіздігін жоспарлауға қатысты мәселелер қозғалды. Ондаған сала өкілдерінің басын қосқан форумның көздегені - Қазақстан урбанистерінің сараптамалық қауымдастығын біріктіру, тәжірибе алмасу, озық тәжірибелерді ұсыну. Республиканың әр өңірінен келген спикерлер, олардың ішінде урбанистер, сәулетшілер, ірі құрылыс салушылар қаланы жоспарлаудың маңызды мәселелерін, экология, әлеуметтік секторын және көлік қауіпсіздігін, сондай-ақ қала тұрғындарын шешімдерді қабылдауға және өңірде коммуникацияны құруға, қоғамдық кеңістіктерді дамытуға және көшелерді қауіпсіз және ыңғайлы жоспарлауға тарту мәселелерін қозғады. Форумға қатысқан өңір басшысы Ералы Тоғжанов "Бүгінгі таңда біз жайлы қалалық ортаны дамытуда жаңа стандарттарды жасау қарсаңында тұрмыз. Бүкіл әлемдегі урбанистер жайлы қалалар салуға талпынуда. Қазақстанда ойластырылған, экологиялық таза және жайлы шағын аудандарды салудың кезеңі келді", – деді ол. Соңғы жылдары урбанистика Қазақстанда қарқынды дамып келеді, себебі қазақстандықтардың 60%-дан астамы қалаларда тұрып жатыр. Осыған байланысты, сауатты қалалық және көліктік жоспарлауға, экология, туризм салаларында қалаларды дамытуға, барлық азаматтар үшін демалуға арналған бос уақытты өткізетін алаңдарға, спортпен айналысуға көбірек көңіл бөлінуде. Соңғы жылдары қала халқының саны айтарлықтай өскен. Тұрғындар саны көбейген сайын оларға қолайлы орта жасалуы керек. Бұл ретте урбанистердің орны ерекше.Форумға әртүрлі салалардан сәулетшілер, ландшафт дизайнерлері, әлеуметтанушылар, университеттердің өкілдері қатысты. Форумның жеке секцияларында урбанистика саласында жаңа білім беру бағдарламалары мен мамандықтарды енгізу мәселелері көтерілді. Биыл елімізде екінші мәрте ұйымдастырылып отырған форум қатысушылар тарапынан үлкен қолдау тапты. Соған сәйкес, ұйымдастырушылар осындай форумдарды Қазақстанның барлық қалаларында өткізуді жоспарлап отыр.