Биыл өңірде 35 елдімекенді су басу қаупі бар. Былтыр 42 елдімекен еді. Ырғыз, Қарғалы аудандарындағы су тасуы 7 ауылда алдын алу шаралары жүргізілген. Қауіп сейілген аумақтар негізінен осы екі ауданда. Арықтар мен бөгеттер салынған. Алға ауданының Тамды ауылында қызыл судың астында қалуы мүмкін 15 үй бар. Ал, Петропавловка ауылында су ылдилайтын жерде 55 үй орналасқан. Ал, шаһарда суға кетуі мүмкін 9 аумақтан қауіп жойылды. Көктемгі су тасқынына қарсы шараларға биыл 200 млн. теңге бөлінген. Қазір мердігер мекемелер анықталып жатыр. Сәңкібай батыр, Әбілқайыр хан даңғылдары, Марьесев, Сәтпаев көшелеріндегі қауіпті аймақтар жойылған. Көктемде су жайылған аумақтарға арықтар салынып, бөгет тұрғызылды. Былтыр Ақшат ауылындағы мектеп аумағы да суға кеткен болатын. Ондағы су бағыты Бұтақ өзеніне бұрылып, екі бөгет тұрғызылды. Қаланың айналасындағы 8 өзеннің табаны тазартылып, кеңейтіліп жатыр. Ол үшін бюджеттен 6 млрд. теңге бөлінген. Елек, Қарғалы, Бұтақ, Сазды, Тамды, Песчанка, Қарғалы мен Жіңішке өзендерінің тасу қаупі жоғары. Өзендер бірнеше жылдан бері тазартылмаған. Жабайы талдар өсіп, құм басқан. Қазір тазарту жұмыстары жүріп жатыр. Мамандардың сөзінше, жыл соңына дейін аяқталады. Екі жыл бұрын қызыл судың ортасында қалған Махамбет ауылы, Құрылыс-1, ВОХР бау-бақша ұжымдарынан қалған тұрғындар көшіріледі. Көшіру мәселесі мамырда шешілуі тиіс. Әр үйдің техникалық қорытындысы дайындалды. Биыл қар көлемі аз дейді мамандар. Қыс басталғалы қала аумағынан 165 мың текше метр қар шығарылды. Жұмыс наурыз айының ортасына дейін жалғасады. Дегенмен, екі жыл бұрынғыдай қызыл су жайлайтын болса арнайы топтар дайын. Жергілікті атқарушы органдар, құтқарушылар мен сарбаздардан 2100 адам мен 700-ден көп техника жұмылдырылады. Бір мезетте 13 мың адам сыятын 78 қауіпсіз орын дайындалды. Бюджетте төтенше жағдай үшін пайдаланылатын 1,5 млрд. теңгеге жуық қаржы бар. Құтқарушылар ел басына күн туса тұрғындардың да қарап қалмағаны жөн деп отыр. Қарапайым халық арасынан алғашқы көмек көрсетуге дайынмын дегендер 26-27 ақпан күндері өтетін "Көктем-2019" арнайы оқу-жаттығуына қатыса алады.