Соңғы 10 ай ішінде біздің спортшылар ел чемпионаттарында 161 медаль, Азия чемпионаттарында 15, Халықаралық турнирлерде 26, Токиода өткен жазғы олимпиада ойындарында қола медаль жеңіп алды. Бұл туралы бүгін өңірлік коммуникациялар қызметі алаңында өткен брифинг кезінде облыстық дене шынықтыру және спорт басқармасының басшысы Евгений Гончаров мәлімдеді. Облысымызда 31 балалар мен жасөспірімдерге арналған спорт мектебі бар. Оның 16-сы қалада, 15-і аудандарда. Мұнда спорттың 44 түрі бойынша барлығы 20 465 бала спортпен айналысады. Оның ішінде 25 олимпиадалық спорт түрінен 15 740, 14 олимпиадалық емес спорт түрінен 2 141, ұлттық спорттың 5 түрінен 2 448 спортшы жаттығып жүр. Барлық аудандық спорт мектептерінің ауылдық округтерде филиалдары бар. Әртүрлі спорт түрлері бойынша Қазақстан Республикасы құрама командаларының құрамына Ақтөбе облысының 481 спортшысы кіреді. Оның 145-і олимпиадалық, 276-сы олимпиадалық емес, 23-і ұлттық, 32-сі параспорт командаларында. Ағымдағы жылы облыс спортшылары ҚР Чемпионаты, ҚР Кубогы, халықаралық турнир, республикалық турнир, Азия чемпионаты сынды көлемді жарыстарға қатысып, 56 алтын, 46 күміс, 70 қола медаль жеңіп алды. 2020 жылы Токиода өткен жазғы олимпиада ойындарына тарихта алғаш рет Ақтөбе облысынан 6 спортшы қатысты. Олимпиада ойындарында спортшылардың сапалы дайындығы үшін Н.Санаев, М.Айнағұлов, В.Худяковқа «Парыз» қоғамдық қорынан 5 миллион теңге бөлініп, 2020 жылға жеке дайындық жоспарлары жасалды. 2021 жылы «Парыз» қоғамдық қорынан қосымша 2 миллион теңге бөлінді. Сондай-ақ қысқы спорт түрлері Мәртөк, Қобда, Қарғалы және Хромтау аудандарында жақсы дамыған. Біздің өңірде ұлттық спорт түрі де қарқынды дамуда.Облыста ағымдағы жылдың 1 мамырынан бастап балалар мен жастар спорт секцияларын жан басына шаққандағы қаржыландыруды жүзеге асыру қолға алынды. Мемлекеттік спорттық тапсырыс 4 пен 18 жас аралығындағы балаларға, оның ішінде ерекше қажеттіліктері бар балаларға қатысты болады. Балалар мен жасөспірімдердің мектептен тыс уақытта дене шынықтыру және спортпен жүйелі түрде айналысуы мақсатында білім басқармасының қарамағында 48 қосымша білім беру ұйымы жұмыс істейді. Сондай-ақ биылғы жылы бұқаралық спортты дамытудың 2025 жылға дейінгі кешенді бағдарламасына сәйкес жалпы саны 8 275 баланы қамтитын 9 балалар мен жасөспірімдер клубтары ашылды.