Өңірдің коронавируспен күрескен ақ халаттылары еңбекақыларын толық ала алмай отыр. Неліктен? Бүгін бұл сұраққа облыстық денсаулық сақтау басқармасының басшысы Самат Данияров пен "Міндетті әлеуметтік медициналық сақтандыру қоры" Ке АҚ облыстық филиалының директоры Батырбек Нұрғалиев жауап берді. Өңірлік коммуникациялар қызметінде өткен брифингте спикерлер медициналық қызметкерлерге жалақы төлеу жөнінде баяндады. Әлеуметтік желілерде өңірдің дәрігерлері дер кезінде жалақыларын алмағаны жөнінде мақалалар жарияланып, көпшілік талқысына түскен болатын. Мәселенің мән жайын бүгін облыстың денсаулық сақтау басқармасы түсіндірді. Басқарма басшысы Самат Данияровтың айтуынша, провизорлық ауруханаларда жұмыс істеп, індетпен күрескен мамандарға негізгі жалақысынан бөлек қосымша сыйақы тағайындалған болатын. Ол үшін жоспардан бөлек жергілікті бюджеттен қосымша қаражат бөлінді. Нәтижесінде провизорлық стационарларда қызмет еткен мамандар еңбекақыларын дер кезінде ала алмады. Алайда, қазір мәселе шешілді. Барлық емдеу мекемелеріне маусым-шілде айларындағы жалақылары толықтай төленді. Алдағы бірер күннің ішінде тамыз айының жалақысы толық беріледі. Басқарма басшысының айтуынша, туындаған бұл мәселе тек кейбір ауруханаларға ғана қатысты. Өз кезегінде "Міндетті әлеуметтік медициналық сақтандыру қоры" Ке АҚ облыстық филиалының директоры Батырбек Нұрғалиев коронавируспен күрес бойынша шараларды қаржыландыру мәселесіне тоқталды. Аталған мәліметтерге сүйенсек, індетпен күрес үшін бөлінген 2 млрд теңге шілдеде толығымен игеріліп болды. Одан бері бөлінген 1 млрд 43 млн теңге аванс ретінде берілген. Енді қосымша 2 млрд теңгеден астам қаражат бөлу тағы жоспарланып отыр.