Облыстық кәсіпкерлер палатасы және қала әкімдігінің мұрындық болуымен бүгін шағын бизнес нысандарына пресс-тур өтті. Оның аясында журналистерге өңірде "Бастау бизнес" жобасының қалай жүзеге асып жатқаны туралы мәлімет берілді. Грантқа ие болғандар ол ақшаны қалай жаратып жатқандарын айтып, көрсетті. Республика бойынша "бастаулықтардың" жобаларын қаржыландыруға барлығы 22,5 миллиард теңге, оның ішінде біздің облысқа 1,3 миллиард теңге көлемінде қаржы бөлінген. Өңірдің 3 жарым мыңға жуық тұрғыны "Бастау бизнес" жобасы арқасында өз кәсібін ашты. Солардың бірі " Бастау бизнес" курсының түлегі Динара Сарманова 200 АЕК көлемінде грант алып, химиялық тазалау цехын ашқан. Цех әзірге жалға алған бөлмеде жабдықталған. Динара бұл жоба арқылы үш қызметкерді жұмыспен қамтамасыз етіп отыр.Пресс-тур барысында өңірлік кәсіпкерлер палатасы директоры Сұлупан Шынтасова мен қалалық кәсіпкерлік бөлімінің басшысы Асқар Кукеев тігін ісі, оқу орталығы сынды нысандарды да аралады. Айта кетейік, ағымдағы жылы «Бастау бизнес» жобасы бойынша облыстың 1 381 тұрғыны онлайн режимде оқытылды. Оның 354-і қала тұрғыны. 935 жоба қаржыландырылды. Оның 318-і Ақтөбеге тиесілі. Ал 128-і несие алса, 807 адам 200 АЕК-ке дейін өтеусіз гранттар алды. Сонымен қатар, биыл облыстық кәсіпкерлер палатасы жанынан «Атамекен Ақтөбе» микроқаржы ұйымы құрылды. Бұл арқылы "бастаулықтар" жеңілдікпен несие ала алады.