"Қазақстанның үздік тауары-2017" облыстық көрме-байқауы өтті. Жыл сайын өтетін шараға қатысатын кәсіпкерлер мен тауар өндірушілер саны биыл артқан. 36 кәсіпкер өз өнімдерін келушілерге паш етті. Облыс әкімінің орынбасары Қайрат Биекенов бастаған комиссия мүшелері баға беріп, үздіктерге "ЭКСПО-2017" халықаралық көрмесіне жолдама берді. Өңірдегі үздік 36 кәсіпкер мен тауар өндірушілер бүгін бас қосты. "Қазақстанның үздік тауары" облыстық көрме-байқауына өз өнімдерін әкелген. Солардың бірі - Гүлсара Нұрпейісова. Қобда ауданынан келген кәсіпкер бөдене жұмыртқасы мен етін өндіреді. Кәсібін 2 жыл бұрын бастаған. Қазір шаруашылығындағы 700 бөденеден күніне 500 жұмыртқа алады. Сұраныс жоғары. Ал, Райхан Сәулебаева халал шұжық шығарумен айналысады. 2016 жылдың соңында бастаған кәсібінің берекетін көріп отыр. Сиыр, қой еті мен тауық етінен жасалатын шұжықтарға шикізатты өзге өңірлерден алдыртады. Шалқарлық Азамат Алагөзов мүсінші. Көшедегі бұтақтары қиылған ағаштардан түрлі мүсін жасап шығарады. Қазақ батырлары мен қыздарының мүсіндерін ояды. Осы кәсіпті жандандыру үшін 2015 жылы 2 млн. теңге грант ұтып алған. Алайда, бүгінге дейін билік тарапынан жұмыс ұсынылмай отыр екен. Бүгінгі облыстық көрме-байқауға аймақтағы үздік кәсіпкер мен тауар өндірушілер шақыртылған. Жеңімпаздар "ЭКСПО-2017" халықаралық көрмесі аясында өтетін "Қазақстанның үздік тауарлары" республикалық байқауға жолдама алады. "Өндірістік мақсаттағы үздік тауарлар", "Халыққа арналған үздік тауарлар" және "Үздік азық-түлік тауарлары" номинациялары бойынша үздіктер анықталады.