Келер қыстың қандай боларын қазір болжау оңай емес. Бірақ Ақтөбе қысы қашан да қатал, әрі ұзаққа созылатыны белгілі. Желтоқсаннан наурыз айына дейін саршұнақ аяз, көк түтек боран, күртік қар, көктайғақты бастан кешіреміз.  Бүгін облыстық ТЖД мамандары "Қазақавтожол" мекемесі қызметкерлерімен бірігіп  техникаларын тексерді. "Қазақавтожол" басшысы Әкімжан Өтемұратовтың сөзінше, техникалар 85-90 пайызға дайын. Қыста ауадай қажет техникалардың саны 76. Тракторлар 20, біріктірілген жол көліктері 18, автогрейдер мен шнекороторлар 15-тен, қар тиеуші техника бесеу, ал бульдозерлер үшеу. 

Жол пайдалану учаскелерінің саны 5. Бұл Заречный ауданындағы №8 учаске болса, қаладан бөлек, тағы Шалқар, Ырғыз және Әйтеке-би аудандарында бар. Сонымен қатар төтенше жағдайда   жол бойында қызмет ететін жеке компаниялар да көліктерімен көмек көрсетуден қашпайды.