Тәуелсіздік мерекесі қарсаңында жүзге тарта отбасы баспаналы болды. Жаңа заманға сай пәтерлер "Нұр Ақтөбе" шағын ауданынан берілді. Көпбалалы батыр ана Айман Досқалиева дәл осы бақытты күнді 15 жыл күтіпті. Ол кезде алпыс жаста болған батыр ана қазір жетпістен асқан. Осы уақытқа дейін балаларымен тар үйде тұрып келген кейуананың қуанышында шек жоқ. Өкінішке орай отағасы бұл қуанышты көре алмай өмірден өтті дейді батыр ана.
Қалалық тұрғын үй қатынастары бөлімінде ұзақ жыл кезекте тұрған 88 адам бүгін осы үйден пәтер алып жатыр. Жаңа заманға сай сәулетті , қаладағы танымал құрылыс компаниясы салған тұрғын үйдің сапасы өте жоғары. Баспана әр шаршы метріне 160-165 мың теңгеге бағаланған. Пәтерлердің ішкі әрлеу жұмыстары да қоныстанушылардың көңілінен шыққанға ұқсайды. Бүгін пәтер кілтін қолына алған тұрғындар үшін баспана ұзақ жылға жалға беріледі. Пәтердің әр шаршы метріне 100 теңгеден ғана төлейді. Мерзімі аяқталғанда пәтер олардың жеке меншігіне өтеді.Бұл үйдегі пәтерлерге қол жеткізген адамдар асыраушысынан айрылған отбасылар, көпбалалы аналар, ауған соғысының ардагерлері, жалпы әлеуметтік қолдауға ие 6 санат бойынша үй кезегінде тұрғандар. Ал жалпы қала бойынша қазір 24 мыңнан астам адам баспана алу үшін кезекте тұр.