Қала көшелерін жөндеу жалғасып жатыр. Жұмыс сапасын "Адалдық алаңы" жобалық кеңсесі мен Жол активтерінің ұлттық сапа орталығы жіті бақылауда. Арнайы тексеру барысында анықталған заңбұзушылықтар мен жол жөндеу жұмыстарындағы кемшіліктер жөнінде келесі бейнематериалда. Бөкенбай батыр көшесіндегі мына жол бөлігінде асфальт мемлекеттік стандарттарға сай төселмегендіктен сүріліп тасталған. Енді аталмыш көшеде жөндеу жүргізіп жатқан мердігер компания - "Ерхат жолдары" ЖШС өз қаражатына жол жабынын қайта төсейді.
Қаладағы жол жөндеу жұмыстарына жүйелі түрде тексеру жүргізіп тұратын Жол активтерінің ұлттық сапа орталығы мен "Адалдық алаңы" жобалық кеңсесінің өкілдері бұл мердігерлердің қателіктерін түзетіп отырған алғашқы жағдайы емес екенін айтады. Осындай кемшіліктер бұған дейін қаланың Абай даңғылында, Жанқожа батыр көшесінде де анықталған. Биылғы жылы қаланың 97 көшесінде жолдар күрделі жөндеуден өтуде. Мамыр айынан бері арнайы тексеру тобымен 56 көшенің асфальт жабыны зертханада тексерілген. Жалпы жол жөндеу жұмыстары қазан айында толығымен аяқталуы тиіс.