Өз өміріңді сақта! Балаларды қараусыз қалдырмаңыздар ! Бүгін бір топ ерікті жастар тұрғындар арасында осындай ескертпелер жазылған парақшалар таратты. Ақтөбе станциясындағы желілік полиция бөлімі қызметкерлерінің қатысуымен "Құқықтық тәртіп " жедел алдын алу іс-шарасының алғашқы күні осылай басталды. Еріктілер қаладағы темір жол вокзалынан бастап, халық көп шоғырланған жерлерде арнайы парақшалар таратып жүр. Карантиндік ережелерді де жастар жақсы біледі. Бетперде киген еріктілер темір жол бойындағы қауіпсіздік ережелерін ересектердің есіне салып тұруды жөн көрген. Өйткені көп жағдайда балалар темір жол бойын кез келген жерден кесіп өтуді әдетке айналдырған. Сондықтан еріктілердің таратып жүрген парақшаларында да " Темір жол-қауіпті аймақ!", Сақ болыңыз, пойыз келе жатыр!", "Балаларды қараусыз қалдырмаңыздар!" деген секілді ескертулер жазылған.
Бүгін Ақтөбе станциясындағы желілік полиция бөлімінде "Құқықтық тәртіп" деп аталатын жедел алдын алу іс-шарасы басталды. Шара барысында тәртіп сақшылары "Тоқтаңыз, басып кетуі мүмкін!" деген акцияны бастап кетті. Бұл шараларға әскерилендірілген темір жол күзетінің қызметкерлері жұмылдырылып отыр. Бірінші рет вокзалда темір жол белгілері салынған билборд қойылып, бейнероликтер көрсетіле бастады. Өйткені желілік полиция қызметкерлері балалар ғана емес, ересектердің өзі жол қауіпсіздігі ережелерін ескере бермейді, дейді. Темір жол бойындағы тәртіпті бақылаушы полиция қызметкерлері тиым салынған жерлермен жүрген 1511 адамның әкімшілік жауапкершілікке тартылғанын айтады. Темір жолдан өтіп кетпек болған жүргіншілер үшін пойыз машинистері 58 рет жедел тегежішті қолдануға мәжбүр болыпты. Мұндай жағдайлар әрине пойызда келе жатқан жолаушылар өміріне де қауіп төндіреді.